Na varios ocacion nos a trece e critica dilanti cu Parlamento no ta haya informacion pa e por haci su trabou debido. Banda di e hecho cu Ministernan no ta contesta pregunta di Parlamentarionan debidamente sea por escrito of den reunion publico, tin e hecho lamentable cu Parlamento no ta haya cifra y analysis di entrada di belasting di Pais Aruba. Na Parlamento tambe e trabou parlamentario ta wordo stroba ya cu reunionnan di e Comicion di Landsuitgaven den cual parlamentarionan ta haya un bista riba e gastonan di nos Pais, tampoco ta wordo yama. Siman pasa mes Pueblo por a experiencia tambe con Minister de Meza a presenta den reunion publico sin trece e contractonan di hedging y e handling fee entre Valero y WEB, siendo cu esaki ta e documentonan cu e parlamentarionan a pidi pe y sin e documentonan aki e reunion no tin sentido. Tur esaki ta pone cu Parlamento no por haci control debidamente riba e presupuesto di nos Pais y tampoco por brinda informacion corecto pa asina Pueblo por sa kiko ta pasando den gobernacion na nos Pais.

CFT tambe a ripara cu Parlamento no ta haya informacion debidamente y cu e parlamentarionan ta wordo stroba den nan trabou di control riba e gobernacion. Pa e motibo aki CFT den su rapport riba e presupuesto 2015 di nos Pais, a conseha Gabinete Eman pa raporta minimo cada kwartaal na Parlamento. CFT a conseha Gobierno pa duna cuenta con ta para cu e entradanan y tambe e gastonan cu ta wordo haci. Banda di esaki Gobierno a wordo conseha pa informa Parlamento riba e progreso di e 24 medidanan cu Gabinete Eman mes a propone pa drecha e situacion financiero.

Mester remarca cu Gabinete Eman no por djies pone e consehonan di CFT aki un banda y haci kiko e kier. CFT lo evalua e informacion cu ta wordo duna den e raportahenan di Gobierno na Parlamento y asina lo midi si e ehecucion di e presupuesto ta bayendo den bon direccion y si e medidanan ta wordo tuma manera cu Gabinete Eman mes a propone. A base di e evaluacion aki CFT lo duna un conseho positivo of negativo na Conseho di Ministernan di Reino na Hulanda pa asina Aruba por haya autorisacion pa por presta placa riba mercado mundial. Pues Gabinete Eman no por keda stroba Parlamento den haci su trabou di control. Si Gabinete Eman no raporta na Parlamento, CFT no lo duna un conseho positivo na Conseho di Ministernan di Reino y gobernacion lo pega ya cu no lo tin autorisacion pa por haya placa fia mas.


29 januari 2015

Expresionnan haci den e articulo aki no necesariamente ta refleha opinion di ArenaPoliti.co