Desde fundacion di partido Union Patriotico Pogresista, UPP, nos a bin ta hiba un sistema di difusion di nos principionan y idealnan, na unda e.o. nos a mustra cu "Good Governance" ta e manera mas concreto y real pa trece solucionnan pa nos problemanan. 
Nos tur sa cu tur gobierno y ministernan (incluso mi persona) a haci nan mes culpabel na  pecamento di reglanan estricto di  "Good Governance".  Mester tene den mente si, cu no ta tur cos cu no ta cumpli cu reglanan di "Good Governance", pa definicion ta corupcion. Ehempel di esaki ta hibamento di maneho cu por cay bou politica di patronahe. Loke nos mester realisa ta cu esaki ta un pensamento cu no tin lugar pe, si di berdad nos ta desea bon gobernacion. Un politico cu a haci su mes culpable di esaki, mester por reconoce cu el a comete un eror. Un eror cu e mester reconoce no ta na bienestar di su mes, ni su partido y mas ainda di nos Pais.
Cu esaki den mente nos a produci un manifiesto na 2012, cu a sirbi pa nos Programa di Partido. For di esaki a sali tambe nos Puntonan di Accion y despues e documento cu nos a yama Compromiso Nacional.

UPP a bay campaña na 2013 cu 3 punto hopi esencial cu nos por yama "speerpunten", esta Good Governance, Educacion y Arubianizacion. Pa e campaña di e aña aki, nos lo amplia esaki cu un punto mas cu ta: "Seguridad". Den nos programa nos ta trata hopi mas aspectonan cu esakinan, pero nos ta kere cu e cuatro puntonan aki ta hopi esencial pa nos atende. E puntonan aki ta primordial pa nos por bolbe restablece e ordo y trankilidad aki na Aruba. Den e siguiente dianan UPP, na un forma comprimi lo bay ta presenta diferente di puntonan aki cu ta hopi cardinal, pa asina nos informa nos Pueblo kico nan por spera di UPP pa e siguiente eleccion. Si pueblo duna UPP e confianza,  nos garantiza cu nos por trece e trankilidad, progreso y felicidad bek na Aruba.

GOOD GOVERNANCE HOPI ESENCIAL Y TA E BASE PA MEHORA GOBERNACION: 
Manera ya nos a bin ta skirbi y papia hopi al respecto, e introduccion di reglanan estricto di Good Governance ta un necesidad urgente pa contra aresta e situacion di gobernacion cu nos a bin ta aden e ultimo añanan. Esaki mester  conta pa delaster un parti den e cadena di gobernacion y tambe pa otro institutonan tanto publico como priva. Y naturalemente pa nos partidonan politico. Ningun instituto, organo y/o instancia por funcciona si esakinan no ta "in place"!
E reglanan aki pues lo no conta solamente pa nos gobernantenan of nos parlamentarionan pero tambe pa nos Raad van Advies, Algemene Rekenkamer, Nos Ministerio Publico, den cuerpo di empleadonan publico, particularmente den esunnan vulnerabel. Ta pesey pa pueblo por ta garantiza cu esnan cu ta traha den e organonan aki tambe mester wordo protehi, y esaki por ser haci cu introduccion di  leynan pa proteha esnan cu ta denuncia actonan cu ta bai contra e reglanan di Good Governance, esta proteccion di e asina yama "klokkenluiders". Y pa e pueblo tambe por ser proteha y cu nan por denuncia MESTER bin cu e instituto Defensor di Pueblo (Ombudsman)! Pues den tur organizacion sea publico of priva, mester tin un responsabilizacion di loke ta ser hasi. Ningun hende por "get away with crime"!!
Alabes mester tin un transparencia total na unda cu desicionnan cu ta ser tuma mester ta comforme leynan y normanan estableci.  Pues tapamento pa otro no mag di sosode, sin tin consecuencia. Den e proceso aki ta indespensabel cu mester sirbi e necesidadnan di  tur esnan involve, teniendo cuenta cu interesnan diferente, den un forma adecuado y sensibel. Na unda tur hende mester sinti cu nan bienestar a ser teni cuenta cune. Esey kiermeen cu tur esnan cu ta sinti cu nan interes lo por ser afecta of cu nan ta interesa, particularmente esnan mas vulnerabel, mester por tin e oportunidad di por participa den e proceso aki y pa haci recomendacionnan y den cierto casonan nan mester por ta forma parti den e toma di desicion. Tur esaki mester sosode den un forma efectivo y eficiente pa segura cu e resultado ta sirbi esnan involvi mihor posibel.

Den e proximo articulonan UPP lo bai mas den detaye riba e punto aki di “Good Governance”, unda nos lo presenta puntonan concreto kico lo mester wordo atendi pa por yega na bon gobernacion aki na Aruba. UPP ta convenci di tin un programa hopi realistico y cu na su turno no mester costa hopi placa, pero si e boluntad y determinacion di tur cu ta desea e cambionan tan desea aki na Aruba. Tur esnan cu tin comentario of kier tuma contacto cu UPP por haci esaki na This email address is being protected from spambots. You need JavaScript enabled to view it..

UPP E ALTERNATIVA REAL Y VIABEL.

Booshi Wever
Lider UPP
Brazil 163

Expresionnan haci den e articulo aki no necesariamente ta refleha opinion di ArenaPoliti.co