Fraccion di MEP den Parlamento a entrega un mocion di desconfiansa contra Gabinete Mike Eman pa e falta di maneho di criminalidad.
Durante e debate cu MEP a yama, a spera di scucha di Minister Dowers kiko e ta bai hasi pa hasi Aruba mas sigur. Sinembargo e minister no a enfoca riba esey. Mas bien a keda tira culpa riba gobierno di MEP di 5 anja pasa y cu oposicion ta exagera. Ta e mesun pensamento eroneo di minister Dowers cu el'a expresa na anja 2012, cu criminalidad no a aumenta, sino ta e percepcion di pueblo ta malo.
Minister Dowers no a admiti cu tin un problema, pero locual ta mas serio, no a duna ningun indicacion di lo cambia algo pa ataca criminalidad cu mas forsa.
"Nos di MEP ta hibando reunionnan cu varios instancianan den comunidad y como tal ta haya hopi informacion di e problemanan real den nos comunidad, pero mas principal ta scucha con por soluciona e problemanan aki. A base di e resultadonan di e reunionnan aki nos ta trese proposicionnan den Parlamento pero no tin oido. Ta di lamenta cu e minister a asumi un actitud asina arogante y no ta sinti e dolor di pueblo. Colega Besaril a describi esaki como falta di empatia di parti di e gobernante pa cu e dolor cu ta biba den comunidad, algo cu e minister no a gusta, pero cu ta e realidad.
Nos a verwacht cu e minister lo a presenta un plan cu e ta baha cu man duro contra criminalidad, pa asina protehe nos hobennan contra atraco na cinema, manera a pasa, of pa protehe nos grandinan cu ta wordo atraca y mara ora nan ta na so na cas. E criminalidad cresiendo bou nos hobennan tambe tin mi hopi preocupa, y nos mester tuma pasonan drastico pa frena esaki. Eynan mi ta diferencia di opinion cu e minister, pasobra e minister a bisa bon cla cu e no por hasi nada y ningun gobernante por hasi nada pa esaki. Ami ta haya cu gobierno su prioridadnan ta equiboca, djis stop di biaha y fiesta poco, y tin placa pa yuda nos hobennan haya un bon futuro.
Pero mirando e falta di accion y di interes di parti di e gobierno, nos a presenta un mocion di desconfiansa contra Gabinete Mike Eman." lider di MEP a duna di conose.

VOTACION
E votacion a bai di tal forma cu net net e minister a scapa di e mocion di desconfiansa. 11 parlamentario di AVP a vota contra, mientras tur 8 parlamentario di oposicion a vota na fabor di e mocion di desconfiansa. Di parti di AVP Donny Rasmijn a bandona sala prome cu votacion, y Melvin Tromp a biaha pa bai festival di tumba. E minister a haya sosten di e minimo di e mayoria y asina a scapa di e mocion aki.

CURATELA
Sinembargo e fraccion di AVP a manda un senjal bon cla pa e minister, cu e mester hasi mas. Cu e mester fortifica su maneho pa combati criminalidad. Esaki nan a pone den un mocion, cu a haya aprobacion di henter Parlamento. Pero e mocion ta bai mas leew, pasobra e mocion ta impone riba Minister Dowers e obligacion pa raporta cada 6 luna na Parlamento. Cu esaki e fraccion di AVP a demostra cu talves nan no por a bai asina leew pa duna e minister un mocion di desconfiansa, pero na nan propio forma a demostra di no ta confia e minister mucho mas. 

"Na final di cuenta, nos ta mas preocupa pasobra e gobierno aki no tin pensa di hasi nada extra pa frena e ola di criminalidad. Cuerponan  departamentonan den husticia ta traha cu alma y cuerpo pa combati criminalidad, pero nan no por mas. Ta momento pa gobierno actua, poer gobierno no kier. Nos ta tuma nan esey hopi na malo. Nan ta prefera sigi malgasta placa na cantidad di otro cos, en bes di purba hasi Aruba mas sigur", lider di MEP a duna di conose.

Expresionnan haci den e articulo aki no necesariamente ta refleha opinion di ArenaPoliti.co