KRALENDIJK – Lider di MEP durante su discurso na Boneiro den fin di siman a refleha tambe riba e posicion di Boneiro awe, 4 anja despues di 10-10-10 cu un structura estatal nobo a base di lasonan mas estrecho cu Hulanda. Awor sinembargo mas y mas den pueblo di Boneiro a lanta vosnan cu no ta asina pueblo ta desea di ser goberna. Indudablemente tin cosnan bon cu a bin di e cambionan estatal di 10-10-10, manera ensenjansa, seguro medico, cuido medico, pero esakinan a bin acompanja cu hopi mas regulacion y costo pa cual mester a introduci mas tipo di impuestonan, cosnan cu ta traha riba continente europeo talvez, pero no necesariamente na Boneiro, y sin cu e pueblo di Boneiro tin voz den dje. Den pueblo di Boneiro ta lantando e deseo pa cambio, pa mas autonomia, pa mas posibilidad pa dicidi riba su mes, y pa menos integracion den Hulanda.

Tur esaki segun Evelyn Wever-Croes a splica, ta cai dentro di e principionan di e manifesto di Nacionnan Uni pa loke ta trata decolonisacion: cu isla colonisa (Boneiro) tin derecho di mas autonomia y emnacipacion, y e pais colonizador (Hulanda) tin e deber di sostene e isla den esaki, y  cu e pueblo di e isla colonisa (Boneiro) hamas por bira un minoria riba su propio tera. Den e eleccion dia 18 di maart esaki lo hunga un papel importante.

Pueblo di Boneiro ta pidi pa wordo scucha, y manera tur politico sa, e voz di pueblo ta e voz di Dios. VOX POPULI, VOX DEI. Un politico cu no ta respeta e voz di pueblo, no merese di wordo yama un politico. Y ta difícil pa comprende cu por tin politiconan cu tin miedo di scucha e voz di e pueblo! Ya St. Eustatius den anja 2014 a conoce un referendum y awor ta e conseho insular mester dicidi con pa traduci e deseo expresa den un status nobo.

Boneiro tambe merece esaki, Boneiro merece mihor, Boneiro por mihor, y e caminda pa logra mas bienestar pa e pueblo di Boneiro ta ora Boneiro por tuma mas decisionnan riba su mes, pa Boneiro tin mas autonomia. Y por favor, no permiti e locual a pasa na Aruba pa pasa na Boneiro. Na Aruba, mescos cu na Boneiro nos ta gusta fiesta y balia, pero no permiti Boneiro bai “feestvierend of dansend ten onder”.

MEP ta para semper cla pa duna sosten y solidaridad na su rumannan na Boneiro den nan lucha pa mayor prosperidad y felicidad di Pueblo di Boneiro. Cual ta e mihor opcion pa Boneiro den Reino, no ta na nos di Aruba pa bisa. Boneiro tin suficiente persona bon prepara, cu e curason na e bon lugar, y cu e mihor intencionnan pa e pueblo di Boneiro. Bosonan ta e mihornan pa evalua cada opcion. Cualquier cu ta e opcion, conta cu nos sosten den cada paso pa logra esaki”, segun lider di MEP Evelyn Wever-Croes.

Expresionnan haci den e articulo aki no necesariamente ta refleha opinion di ArenaPoliti.co