Siman pasa Parlamento a debati cu Minister Dowers riba e ola di criminalidad cu ta suta nos Pais y e situacion di ilegalidad na nos frontera. Durante e reunion nos a haci diferente pregunta na e mandatario riba e preocupacionnan cu ta ser treci dilanti pa cuidadanonan di nos Pais cu ta concerni ilegalidad na nos frontera, e problemanan na inmigracion y tambe riba e negoshi cu ta wordo haci cu permiso na nos Pais. Lamentablemente nos Minister Dowers a keda masha corto den contesta y a laba man di e preocupacionnan treci dilanti.

Negoshi cu permiso
Nos a haci pregunta na e mandatario di Husticia si tin un investigacion andando riba permisonan cu ta wordo duna, ya cu nos a compronde cu tin mas di 10 mil permiso cu lo a wordo duna pa trahador domestico. Nos a puntra e mandatario si ta normal cu tanto cas ta pidi permiso pa un hende bin biba serca nan pa haci trabou domestico. Minister Dowers a djies laba man bisando cu e no ta minister di extranheria. Esaki sigur no ta un contesta serio cu Parlamento ta spera di un minister di Husticia, ya cu no ta normal cu tanto permiso asina ta wordo duna y pa esaki lo mester por tin un investigacion y e Minister di Husticia mester por ta na altura di esaki.

Inmigracion
Na varios ocacion e trahadornan di Inmigracion a trece nan preocupacion dilanti cu nan no tin material pa traha, no tin uniform, no tin landsbesluit, no ta haya bevordering y ta mira cu e hefenan si ta haya kledingvergoeding, telefoonvergoeding, auto di dienst y bevordering. Pesey nos a trece e reclamo aki dilanti cu e pregunta na Minister Dowers kiko ta wordo haci cu e preocupacionnan aki. E mandatario di Husticia aki tambe a djies laba man bisando cu ta leiding mester zorg pa material y no ta tur cos un minister sa. Banda di esaki e Minister a core pa su responsabilidad door di trece dilanti cu ta MEP a crea problema na Inmigracion door di nombra hende na inmigracion cu no ta cualifica. Di un minister encarga cu Husticia nos a spera un contesta mas serio ya cu ta trata aki di cuido di nos frontera. E excusa fofo cu MEP a nombra hende no kita e responsabilidad di Minister Dowers pa atende cu e reclamonan cu e cuerpo di Inmigracion ta trece dilanti na un manera serio.

Mocion di desconfianza
Un Minister mester responsabilisa su mes debidamente na Parlamento. Un Minister di Husticia no por djies laba man riba preocupacionnan cu ta biba den comunidad riba e negoshi cu permiso y inmigracion. Pa e motibo aki y mas Fraccion di MEP a presenta un mocion den cual nos ta desaproba e maneho di Minister Dowers.E fraccion mayoritario den Parlamento no a sostene e mocion aki y di e manera aki a bay di acuerdo tambe pa laba man di e preocupacion riba negoshi cu permiso y inmigracion.

3 februari 2015

Expresionnan haci den e articulo aki no necesariamente ta refleha opinion di ArenaPoliti.co