Porfin e Presidente di Parlamento Sra. Mervin Wyatt-Ras a yama e reunion publico pa diamars 2 di Mei 2017. Despues di hopi presion lo trata e caso di Minister di Asuntonan di Labor y Hubentud den persona di Sr. Paul Croes. E Minister aki ta un berguensa nacional y e ta mustra con corupto y sin integridad Gabinete Mike Eman ta.  Y esaki despues di un inval na su cas alrededor di 5:30 am door di diferente departamento di gobierno di Hulanda y tambe di Aruba bao guia di Minsterio Publico. Esta un berguensa pa nos pais! E Minister ta bao cinvestigacion penal pa mas di 2000 Ontheffingen. E tawata un crimen organisa y structura unda varios otro hende ta involucra. Tawata cobra sumanan di 5000 pa 7000 florin pa permiso. Esaki ta muestra con corupto e Gabinete aki ta. Colmo de los colmos ta haya un señora ilegal ta traha pa e Minister. Tin hopi speculacion den pueblo cu tin hopi cos mas di sconde y ta aki Ministerio Publico mester ta imparcial y no practica husticia di clase. 

Den pasado Movimiento Electoral di Pueblo a entrega mocionnan di desconfiansa contra Minister Arthur Dowers di Husticia y Benny Sevinger di Infrastructura pero fraccion di AVP a vota contra esakinan. Awe nos tin den apenas cuater luna 25 atraco. Nos no tin seguridad mas den nos pais. Miles di km2 di tereno regala na un solo famia liga na AVP y pueblo ta warda pa mas di 11.000 peticion pa tereno y mas di 3000 pa cas social. Pero esaki no ta prioridad di Gobierno. Nan prioridad ta interes personal y sponsornan di partido AVP. E grupito di 1% ta prioridad pa Sr. Mike Eman y su aliado Sr. Otmar Oduber di POR. Sr. Paul Croes no por keda riba schorsing. Esaki ta inconstitucional y Mike Eman no por entrega mas di nos Autonomia cu su mal maneho. Op staande voet Sr. Croes tin cu bay y sin overbruggingstoelage, pasobra si bo horta na trabao bo ta bay cas y esaki ta locual Sr. Croes a haci. Un acto coruptivo y sinberguensa perhudicando miles di nos conciudadanonan. Cambio awor na September dunando Movimiento Electoral di Pueblo e tarea pa drecha e desorden crea pa Mike Eman y AvPor cu lo tuma nos te banda di 2057 pa lanta cabes bek. Nos kier biba den trankilidad unda nos ta crea un pais pa nos tur biba den harmonia y prosperidad.

Expresionnan haci den e articulo aki no necesariamente ta refleha opinion di ArenaPoliti.co