Un reunion hopi baho y sushi di parti di AVP    

Diamars e reunion publico pa trata e caso di corupcion di Minister Paul Croes a tuma luga. E reunion a cuminsa un poco despues di 8or di mainta cu por cierto a cuminsa bastante bruha y asina el a sigui tambe durante henter e dia te den oranan laat di anochi. Parlamentario di MEP, sra Evelyn Wever-Croes ta elabora riba e reunion aki:

“Prome, e Presidente di Parlamento, sra Mervin Wyatt Ras, contrario na e reglamento di ordo, a tarda pa yama e reunion. Esaki ta un violacion di orden ya cu e reunion aki ta tumando lugar despues di 30 dia cu e reunion a wordo pidi. Na di dos luga, el a pone dos punto di agenda hunto. Dia 26 di april, Desiree Croes a pidi un reunion tocante crimen organisa. Y Fraccion di AVP a pidi pa trata tur dos punto hunto. Esaki tambe ta contra e spirito di reglamento di orden door cu no por pone dos punto di agenda cu no tin nada di haber cu otro hunto. Y di tres, e peticion di Desiree Croes no tabata firma pa tres persona manera articulo 23 di reglamento di ordo ta exigi.

Kiermeen, Presidente di Parlamento, a viola reglamento di ordo, y a forza e reunion aki. Un reunion cu a bay hopi sushi y baho di parti di Parlamentario y Ministernan di AVP. Unico cos cu AVP a trece dilanti ta acusacionnan na mi persona manera ta mi integridad ta wordo questiona manera cos ta ami ta esun cu a haci malo. Nan no a toca e tema di Paul Croes mes.

Fraccion di MEP a trece preguntanan crucial dilanti. Mi persona a haci basicamente 4 pregunta y mi a elabora rond di e preguntanan aki. E preguntanan aki ta:

1. Kico ta e status di Paul Croes desde 28 di maart te cu awe? 
Kico ta su status den futuro si e keda como minister pasobra nan a bisa cu e ta nonactief pero nos no conoce esey den nos leynan. Aki Mike Eman a contesta cu nan a bay busca den Reino otro alternativa pa nan compara y nan a yega na e ehempel di Sint Maarten. Na Sint Maarten, ora cu bo ta un acusado, bo ta wordo “geschorst” mesora y ora bo wordo condena, e ora bo lo wordo retira. Y esaki ta e analogia cu nan a uza na Aruba.

Ariba e contesta aki, mi a bisa e Prome Minister cu ningun momento el a schors Minister Paul Croes. Sino el a pon’e riba nonactief of un vakantie. Dus e analogia aki no ta klop. Ademas, con ta posibel cu ta net Sint Maarten nan a uza como ehempel siendo cu nan a caba di haya un KB riba falta di integridad? Dus ta riba e direccion ey nos ta bayendo? Dus nos no a haya contesta si e minister a keda cu autoridad pa firma.

2. Ken ta e reemplasante di sr. Paul Croes?
Na prome instante nan a bisa cu Bermudez lo tuma over e cartera di Paul Croes, aunke Bermudez mes a biaha pa tres siman. E ora mi a bolbe puntra ken ta reemplace y a base di cua ley. Riba esaki Prome Minister a contesta cu segun ley, e Minister di Educacion ta esun cu lo reemplace. Pero esaki no ta para den ningun ley. Sinembargo, nos a comprende cu ta Minister Sevinger ta esun cu ta of lo reemplasa Paul Croes. Dus aki tambe tur cos ta bruha.

3. Dicon Mike Eman no a haci nada? 
Den e un aña y mei cu Mike Eman a haya sa di e actividadnan cu sr Paul Croes tabata haciendo, e no a haci nada. E contesta cu Mike Eman a duna ta cu e la papia cu sr Paul Croes riba e asunto aki y no a bisa nada mas. Aki ta unda e lider di e gabinete a faya.

4. Paul Croes lo bay tuma su retiro e siman aki? E pregunta aki Mike Eman no a contesta mes.

Esaki tabata e prome tanda pa loke ta trata e preguntanan cu mi a haci y e contestanan cu mi a haya di e Prome Minister. Un tanda cu a bay hopi sushi mes. Na unda primonan di mi a wordo menciona. Algun primo cu mi conoce y algun mi no sa mes ken nan ta of si nan ta existi mes.

Den e Segundo tanda nos Fraccion a entrega un mocion di desconfiansa pasobra nos ta kere cu Minister Paul Croes mes mester a entrega su retiro. Sinembargo esaki no a pasa y nos di MEP mester duna e señal corecto na e comunidad cu ora cu diferente institutonan manera RST, Koninklijke Marechaussee, Fiot di Aruba, Fiod di Hulanda, Ministerio Publico, K-9 Unit, Cuerpo Policial ta haci un inval na cas di un minister, no ta algo normal. E cos aki ta algo hopi serio”, e Parlamentario a termina ta bisa.

Expresionnan haci den e articulo aki no necesariamente ta refleha opinion di ArenaPoliti.co