SANTA CRUZ - Den Parlamento minister Angel Bermudez a duna informacion tocante e situacion financiero precario di pais Aruba, y splica con grandi e MEGA DEBE ta na e momento aki. E minister a parti documentonan cu ta mustra cu e debe nacional di Aruba na e momento aki ta 4.000.000.000 florin. Cual ta representa 80% di GDP. E suma aki ta uno exorbitante, y ta dificil pa pensa cu un gobierno su so, den apenas 5 anja, por a causa un pais asina tanto daño y asina tanto debe. Pa por baha e debe aki, y pone bek na e nivelnan cu Aruba a conose bou di gobiernonan di MEP, lo tarda 20 anja segun e expertonan di CFT a calcula.

"Den campanja electoral na 2013 nos a trata na alerta nos pueblo pa e MEGA DEBE aki. Mike Eman y su partido a nenga cu e debe tabata asina halto, es mas, nan tabata kier pa tur hende kere cu cos ta bon na Aruba. Awe nos a mira con el'a redobla e debe di nos pais, y hiba na nivelnan peligroso, poniendo Aruba na borde di bancarota. Y ainda e mes no ta realisa e peliger cu e ta hinca henter e pueblo aden, pasobra e ta sigi cu su fuesta y e ta sigi hipoteca nos pais.

Ami ta masha preocupa pa esaki. Ademas, mi ta indigna, pasobra Mike Eman y su gabinete a hipoteca no solamente nos generacion, pero tambe di nos yiunan y nan yiunan, sin cu e tabata tin autorisacion pa hasi esey. Awe nos ta mira con ensenjansa ta deteriorando, y mayornan mester bai paga mas pa nan yiunan por haya un educacion. Tur esaki ta e consequencia di e MEGA DEBE cu Mike Eman a hinca nos pais aden", lider di MEP a duna di conose.

Expresionnan haci den e articulo aki no necesariamente ta refleha opinion di ArenaPoliti.co