Den un carta fecha 28 di januari 2015, Fiscal mr. Bart Schmitz, informa Parlamentario di MEP, sr. Guillfred Besaril, cu Ministerio Publico ta conclui abase di un "Feitenonderzoek" di Landsrecherche, cu sr. Besaril NO a comete ningun infraccion contra Ley durante e accidente di dia 8 di maart 2014. Berdad cu Parlamentario Besaril a bandona e sitio di desgracia, pero esaki no ta un acto castigable, y ademas e a cumpli prome cu TUR e requisitonan cu e Ley di Trafico ta exigi.

Den medionan di comunicacion y tambe e diferente opinionnan riba rednan social a cataloga e hecho aki como un "Hit & Run", locual expertonan di trafico tur tempo caba a bisa di NO ta berdad! E hecho cu como chauffernan bo laga bo auto atras, cu autoridad competente tin conocemento claro di ken tabata na stuur, compaña di tur informacion necesario, ta hasi cu automaticamente un parti di e ley di "Hit & Run" ta cai completamente afo. E otro aspecto importante den dicho Ley ta esun di no laga niun hende herida atras sin atencion of cuido di emergencia necesario. Den caso di sr. Besaril, e la cumpli integralmente cu e aspecto aki tambe, ya cu e personal di ambulance a presenta mesora na e sitio di incidente pa atende cu chauffer contrario.

Como cu ta trata di un figura publico y den cuadro di transparencia, Husticia por medio di tanto Cuerpo Policial como Ministerio Publico atravez di Landsrecherche a dicidi di repasa e hechonan y a conduci un investigacion extenso di e incidente, cu e resultado positivo pa Parlamentario sr. Besaril. Conforme e investigacion cu a keda entrega na Ministerio Publico dia 22 di october 2014, Landsrecherche su investigacion tabata asina extenso, cu a hasta investiga si e rumornan cu Parlamentario sr. Besaril a bandona e sitio pa evita un test di alcohol por tabata berdad y e conclusion di Landsrecherche tabata CONTUNDENTE; e rumornan aki ta totalmente infunda!

Fiscal mr. Bart Schmitz, kende a evalua e investigacion, a conclui cu NO tin base alguno pa ningun persecucion penal contra sr. Besaril. Ministerio Publico abase di e investigacion, ta conclui cu sr. Besaril no a comete ningun delito durante of despues di e accidente di auto. Ademas e rapport di experto di trafico di Cuerpo Policial tambe ta indica cu no tin ningun irregularidad y e Parlamentario mes NO tabata esun causante di e accidente tampoco.

Cu esaki ta aclarea cualquier duda cu por tabata tin tocante e accidente aki, y especialmente entorno di integridad di sr. Besaril. "Partido MEP ta gradisi tur cu a sostene sr. Besaril y a confia den su integridad. E berdad semper ta alcansa e mentira, ni con bon e mentira ta", tabata palabranan di Lider di MEP, Evelyn Wever-Croes.

Expresionnan haci den e articulo aki no necesariamente ta refleha opinion di ArenaPoliti.co