Den conferencia di prensa ultimo Parlamentario, sr. Guillfred Besaril, a elabora riba tres (3) incidente di siman pasa, caminda un biaha mas arma di candela a hunga un rol critico. Parlamentario Besaril a declara lo siguiente:

“Siman cu a pasa a tuma lugar tres (3) incidente den cual tabata tin arma di candela envolvi. Di biaha mi aserca esnan cu ta traha den field y mi a bin compronde cu keto bai Aruba su Cuerpo Policial division uniforma (Surveillance) ta trahando cu un capacidad minimo di 1 cu 4 (Chef van Dienst cu cuatro personal) den siman. Den weekend ta hasi lo posibel pa e capacidad ta minimo 1 cu 5.

E hecho aki ta totalmente inacceptabel den 2014! E cantidad di personal riba dienst cu mi ta referi na dje, tabata un norma cu por a wordo aplica mas cu 20 aña pasa, tempo cu Aruba su poblacion ta mas o menos 65 mil habitante. Aruba a conoce un aumento explosivo di su poblacion den decada '90. Awendia e cantidad di habitante ta casi 115 mil. Pues e simpel logica ta dicta, cu mester aumenta e cantidad di personal den uniform cu ta traha na Surveillance Dienst.

 Awor cu e poblacion di Aruba a casi duplica, e dilema cu Cuerpo Policial ta hañe confronta cune ta, esun di aumenta e cantidad necesario di personal pa por brinda Pueblo e servicio preventivo como debe ser vs. mantene e gastonan di operacion den e margen cu Gobierno ta delinea pa e organisacion policial. E dilema aki no ta exclusivo di Cuerpo Policial. Diferente departamento den Husticia, entre nan "Guarda Nos Costa" y "CEA", cu tambe ta departamentonan cu ta contribui cu e materia "Prevencion", ta enfrenta e mesun dilema aki.

Pueblo ta preocupa y ki ora cu tin un atraco cu arma di candela of detencion di personanan den posecion di arma di candela, Pueblo ta reclama pa mas seguridad! Ciudadano Minister di Husticia a tarda demaciado pa presenta un maneho integral pa cu Combatimento di Criminalidad. E hecho aki a permiti cu e departamentonan di Husticia awe ta traha "IN VACUO", pues cu liñanan di manehonan cu ta mucho individual y poco eficiente.

Den Pueblo te reina un disgusto pa cu e cantidad di Polis y Riot Comando cu tabata cla riba pia na momento cu Pueblo kier hasi uzo di su derecho na manifesta, mientras cu na momento cu e mesun Pueblo mester sinti su mes sigur y protehi, no ta sinti esaki. No ta pornada Fraccion di MEP a rezona su voz den Parlamento na momento cu Gobierno a presenta e presupuesto 2014. Paso Fraccion di MEP no a sinti cu Gobierno a pone accento riba e dolor y preocupacionan di Pueblo, pues entre nan Husticia y Seguridad.

Partido MEP lo keda boga pa un nota di maneho di parti di Ciudadano Minister di Husticia, pa asina nos por contribui den e discusion di Combatimento di Criminalidad y Seguridad di Pueblo di Aruba, paso na final di dia Aruba Merece Mihor!" Parlamentario Besaril a termina.

Expresionnan haci den e articulo aki no necesariamente ta refleha opinion di ArenaPoliti.co