For di Hulanda Parlamentario sr. Guillfred Besaril a elabora den un entrevista riba e accidente autmobilistico di collega Parlamentario sr. Chris Dammers. Parlamentario Besaril a expresa di e siguiente manera:

"Lagami cuminsa na menciona cu mi no ta e tipo di hende cu ta desea malo na otro, mucho menos ta gosa cu dolor di otro, vooral ora ta trata di un persona cu mi conoce pa asina tanto tempo manera sr. Dammers. Pero lamentablemente su actonan no por keda sin wordo exponi na Pueblo. Ta Parlamentario, sirbidor di Pueblo nos ta y ta e responsabilidad cu nos tin pa cu e comunidad cu a deposita nan confiansa Politico den nos.

Awe ta exactamente un siman pasa, cu sr. Dammers a pasa man cu e yabi di e Ford Edge di Staten, pa despues hañe den marduga envolvi den un incidente cu a laga como resultado: "Un auto di dienst cu un daño material (cu segun propio declarion di sr. Dammers na Prensa) di mas cu 10 mil florin!" E forma con tur cos a bai ta totalmente robes, pa motibo cu no a tuma contacto of a envolvi autoridad competente den ningun forma. Ta solamente un experto di trafico of polis uniforma por constata si acaso e accidente ta eenzijdig (unilateral) of cu si tin cualkier tipo di daño na un tercera persona.

Segun propio declaracion di sr. Dammers, seguro lo bai cubri gasto di un baki mata. Esaki nifica cu nos por conclui cu tin daño na propiedad un tercera persona y por lo tanto no ta trata di un incidente unilateral cu por keda sin raporta na polis. Pa colmo ta trata di un vehiculo di dienst, pues un motibo extra pa comunica mesora cu autoridad. Cualkier ambtenaar cu lo a hinka den su cabez na hasi loke sr. Dammers a hasi, lo a hañe confronta cu problema disciplinario masha serio mes. Ademas di para personalmente responsabel pa e gastonan, e ambtenaar por hasta perde su trabow, pa motibo cu lo tin falta di confiansa den su persona como trahador. Djis puntra cualkier ambtenaar, den cuanto cos nan ta pasa na ora di haña nan envolvi den incidentenan cu vehiculo of material di gobierno. Ta pa es motibo ey mes, ta masha importante pa raporta e sucedidonan na e autoridadnan competente.

Esaki ta un di e diferencianan grandi entre mi comportacion na maart 2014 y e actuacion di sr. Dammers, Diahuebs marduga di siman pasa. Manera cu e accidente a tuma lugar, e prome cos cu mi a hasi tabata yama avisa central di Polis di e accidente, señala unda e accidente a tuma lugar y cu ta mi mes personan tabata envolvi. Esaki ta e motibo dicon na ningun momento por a papia di un "Hit and Run" den mi caso. Apesar di e insistencia di fraccion di AVP, nunca mi a viola ningun ley of regla. Mi identidad tabata conoci di biaha. Un otro diferencia ta, cu mi a baha busca drechi di e otro partido, hasta ambulance mi a yama pa e persona. Sr. Dammers no a hasi esaki y no a buscando e drechi di e doño di baki mata na e momento ey. Si e la yama polis, nan lo por hasta yude den e buskeda. E ultimo diferencia ta cu ami si a cumpli cumi responsabilidad social dunando cara na comunidad atravez di un rueda di prensa den cual mi a comparti tur detayes, enfrentando e realidad. Sr. Dammers a opta pa keda keto y ta te na momento cu e noticia a plama, a core duna prensa un declaracion.

Sr. Dammers a comete un error den calculacion! E la subestima e concecuencianan di su acto. Un accidente por pasa cu nos tur, pero tin un forma regla pa ley con cosnan mester sosode. Con nos mester actua y con pa carga bo responsabilidad. Mas ainda si bo ta un figura publico. Mi ta termina deseando sr. Dammers forsa y sabiduria pasobra, malo mi no ta pidi pa ningun hende! Pero mi ta cumpli na informa si, cu nos Fraccion lo manda un cuestionario na Presidente di Parlamento y Minister di Husticia. Enbista di e sucedido y e dudanan cu tin na e momentonan aki, ta un investigacion di parti di Landsrecherche, mescos cu a sosode den mi caso, lo MESTER tuma lugar!", tabata palabranan di Parlamentario sr. Besaril.

Expresionnan haci den e articulo aki no necesariamente ta refleha opinion di ArenaPoliti.co