Durante di e prome conferencia di PPA teni na hogar di nan presidente sr. Eddy Bennett, PPA a presenta un parti di nos programa ‘ARUBA ….PA E PROXIMO NIVEL 2017 -2021’ esta e parti con PPA ta mira cu nan por contribui na mejora e ‘siguridad di Aruba’ y pueblo henter den futuro y ta carga e titulo di ‘Masterplan pa Siguridad di Aruba!’. PPA a accentua cu mientras cu otro ta ofrece e pueblo bandera y sticker pa lunas largo PPA ta inicia cu campanja ofreciendo nos pueblo vision, idea como parti di nos programa dedica na Siguridad…kada dos siman ta intencion pa presenta otro parti di e programa total di partido PPA.

OPTIMALISA FUNCIONAMENTO DI CUERPO DI POLIS!

Maneho di PPA projecta den e masterplan aki tin como meta pa optimalisa funcionamento di Cuerpo di Polis riba nos Isla…y mester por pone mas ‘blauw riba caya’ na un manera structura.

STRUCTURA DI WARDA DI POLISNAN LO WORDE ADAPTA !!

PPA a presenta un MAPA di Aruba riba cual basa riba colornan pero tambe indicacion unda tin actualmente e diferente ‘post’ di cuerpo di polis nos vision/idea con den futuro nan PPA lo desea di contribui na mejora e ‘siguridad’ di nos pueblo.

Primeramente a splica cu actualmente Aruba ta reparti den cuatro districto for di unda Cuerpo di Polis ta guia y controla nos Isla esta Oranjestad, Noord, Sta Cruz y San Nicolas. Ta intencion di PPA pa trece cambio den e parti di San Nicolas na unda PPA a projecta un Warda di Polis pa atende cu desaroyonan na Sabana Basora, Pos Chikito y Spaans lagoen. Administrativamente e warda aki lo keda cai bao di e Comisario encarga cu San Nicolas. Tambe PPA den cuadra di e hecho cu baby beach y Rodgersbeach ta worde usa pa e entrada di ilegalnan PPA su maneho lo frena e desaroyo aki. PPA ta projecta un post di Strandpolitie den Seroe Colorado y na mes momento ta projecta un toren di vigilancia aki.

Cuerpo di Voluntario Arubano (CVA):

Na mes momento PPA ta propone pa introduci un asina jama CVA(estilo VKC na Corsow) cual su structura official ta worde projecta tambe na Sabana basora/Pos Chikito.

JFK SCOL LO WORDE DESTINA COMO E PROXIMO WARDA DI POLIS PA ORANJESTAD Y DAKOTA !

Pa motibo strategico cual lo aumenta e siguridad cu Cuerpo di Polis por ofrece PPA ta propone pa e x JFK scol worde destina como e proximo ‘warda di polis di Oranjestad y Dakota. Algun di e motibonan ta: 

1. Sitio mas strategico for di unda Cuerpo di Polis por funciona !
2. Cuerpo di Polis na e sitio aki lo duna siguridad na ‘Ontvanger der Belasting’ y otro edificio di Gobierno y priva aki no mucho leeuw for di lama unda cualkier dia un grupo por drenta cu meta criminal.
3. E asina jama salida ‘uitrukmogelijkheden’ di polis den tur direccion ta mucho mas efficiente….Vondellaan y Stadionweg pa Dakota/Tarabana etc….., Pa Oranjestad p/m di Vondellaan y LG Smith Boulevard y Lacle Boulevard…!!
4. Majoria sitio unda evenemento grandi ta tuma lugar ta hopi serca esta Centro di Cultura, Stadion Guillermo Triniadad etc.
5. Por tira miho vista riba e desaroyo cresciente dilanti ‘Talk of the Town’.
6. Ora di Carnaval Cuerpo di Polis lo ta na e skina di e dos caretera mas importante pa Carnaval cual ta Vondellaan y LG Smith Boulevard. 

Toren di vigilancia: Ta intencion di PPA segun nos masterplan pa construi un ‘toren di vigilancia’ acerca na e x JFK scol pa mejora e tarea di nos Cuerpo di Polis.

RENOVACION DI WARDA DI POLIS DI SAN NICOLAS !

E masterplan di PPA ta ensera tambe plannan pa renovacion di Warda di Polis na San Nicolas y mantencion debido di tur warda di polis riba nos Isla.

RECLUTA Y SELECTA INTERESADO PA BIRA POLIS LOCALMENTE Y NA HULANDA:

Consciente di e hecho cu Aruba no tin suficiente polis PPA su programa ta ensera un accento pa recluta y selecta interesado pa bira polis. Un idea cu te na e momento aki ningun otro organisacion politico a lanta ta e idea di busca interesado bao di e arubianonan biba na Hulanda tambe. Aki PPA tin bista riba arubiano cu a bai studia na Hulanda y no a logra pero a keda biba na Hulanda. Lo formalisa un maneho cu sosten hulandes pa stimula e jovennan aki pa sigui rumbo pa bira polis y trece nan bek Aruba !!

OPTIMALISA FUNCIONAMENTO DI POLIS DI BARIO !

Ta intencion di PPA pa optimalista tur post di polis di Bario riba nos Isla.

SOSTENE UN ORGANISACION DI LIFE GUARDS !

E masterplan di PPA ta ensera tambe pa Cuerpo di Polis sostene un organisacion di Life guards riba nos Isla mirando e tantisimo hugamento especialmente di turistanan di ultimo anja. Tambe e intencion ta di trece e servicio di ‘helikopter’ bek.

PPA ta accentua cu e entrada official di nos Isla segun nos L.T.U ta haf di Oranjestad, Aeropuerto International di Aruba, haf di Barcadera y haf di San Nicolas y esaki ta tuma lugar bao di wowo legal di e instancianan … Cuerpo di Polis grensbewaking, IASA grenscontrole, Cuerpo di Aduana.

RESTRUCTURACION DI CUERPO DI BOMBERO:

Esaki segun masterplan di PPA lo tuma lugar door di crea un post di Brandweer na Balashi tambe y utilisa e facilidad di instruccion mas na Balashi. Tambe PPA ta papia di crea un asina jama CBV (Cuerpo di Bombero Voluntario) . PPA ta mira cu kada instancia cu tin un edificio grandi por apunta un 3 pa 4 persona cu lo bira bombero voluntario.

PPA su masterplan ta projecta cu PPA lo sostene e desaroyo di ‘neighbourhood watch’ riba nos isla.

E masterplan ta indica tambe cu PPA lo structura y crea un fundeshi official pa esnan cu ta labora den siguridad di nos Isla . Esaki door di ofrece curso y e fundeshi official pa e tarea aki ! Training standariza, screening y clearance.

Hot zone’s of zona cayente lo hanja un Sistema di camera di vigilancia.

RENOVACION DI K.I.A. (Korrectie Instituut Aruba).

E masterplan di PPA ta tene cuenta cu K.I.A. y ta accentua cu lo mester renova y moderniza e edificio di K.I.A. Na mes momento lo mester hiba un maneho pa coregi preso y prepara pa nan regreso den nos sociedad.


PPA a presenta nos masterplan na prensa y pueblo. Nos no ta kere den presenta bandera y sticker pa loco….pero vision, idea y programa na nos pueblo pa asina PPA projecta con nos tin intencion di hiba ‘Aruba …..pa e PROXIMO NIVEL !’.

Aruba, 3 di juni 2017
Lider Politico di PPA
BENNY NISBET

Expresionnan haci den e articulo aki no necesariamente ta refleha opinion di ArenaPoliti.co