Den e conferencia di dialuna ultimo parlamentario Glenbert Croes a elabora riba e projecto di hospital. E parlamentario a declara lo siguiente: “Diahuebs awor nos lo tin un reunion publico relaciona cu e projecto di hospital cu nos fraccion a pidi anja pasa februari. A pesar cu a dura hopi nos ta bisa “mas bale tarde que nunca” pasobra e lo bai sosode net na un momento crucial unda cu den e dianan aki e disputa ta andando di pakiko a laga e sala di operación afor for di full e projecto.

E discussion cu a surgi ta bolbe pone un lus si realmente e decision cu a wordo tuma y procedura encamina tawata esun corecto. E meta di MEP ta pa cuestiona full e procedura poniendo tur iregularidad riba mesa y si acaso tin suficiente base ehecuta un encuesta parlamentario. Mescos cu nos a pone empeño den ehempel e caso di hedging cual a conduci na un “feitenonderzoek” lo ta e proposito di nos fraccion cu e projecto di hospital. Hecho ta cu un investigacion independiente lo tin su balor agrega enbista cu e sala di operación a keda exclui for di e projecto cual no ta logico.

Nos ta kere cu e proposito di e reunion aki ta pa logra un consensus den parlamento pa gobierno por laga hasi un “feitenonderzoek” independiente pa revisa e proceso di decision, evaluacion y mapanan di projecto. Nos ta conciente cu tin cierto decisionan cu no por wordo revoca pero e hospital ta un projecto di pueblo y mester sigura cu e projecto aki wordo ehecuta na un forma responsabel sin cu esaki lo bai costa astronimicamente hopi. A pesar cu tin cosnan cu no por cambia nos ta di opinion cu un “feitenonderzoek” por wordo hasi pa asina por wak tur e problemanan cu tin pa por resolva esakinan. Si acaso conclui for di e “feitenonderzoek” a base di constatacionnan cu tin necesidad pa un encuesta parlamentario nos ta dispuesto pa hasi esei. Pero nos mester ta realistico si algo no ta viabel dibiaha cu nos tin otro camindanan pa sigui manera un feitenonderzoek cu lo por bisa nos e berdad di e projecto aki. Hecho ta cu evaluacion di e projecto aki na un forma independiente lo por logra clarifica hopi irregluaridadnan manera entre otro e proceso di bidding. Nos ta spera cu sano huicio prevalece pa den interes general parlamento di aruba tuma un decision cu lo por contribui na bienestar general sin cu e costa pueblo dimas, tawata palabranan di parlamentario Croes.

Expresionnan haci den e articulo aki no necesariamente ta refleha opinion di ArenaPoliti.co