Ta  bisto caba pa henter comunidad cu e ansha y desesperacion den seno di AVP ta birando cada dia mas grandi ya cu nan consenshi ta sigui remorde pa loke nan a haci cu e finansa publico di nos pais, esta hinca nos den un estado di bancarota total. No ta falta un dia cu e lider di fraccion di AVP, Baba Herde ta sigui insisti cu e politica di locura di “eerst groeien, dan snoeien” ta e instrumento ideal pa saca nos pais padilanti. Tambe tur dia Baba Herde ta sigui trata di manipula mente di pueblo bisando cu e crecemento economico durante e ultimo 2 añanan aki tabata algo excepcional.

Record di divisa na 2009
Sinembargo un topico cu nunca Baba Herde kier trece padilanti den su sin fin di comunicadonan ta e desaroyo di nos reservanan di divisa, ya cu ta mas cu logico cu si e crecemento economico tabata asina bon durante e ultimo añanan, esaki lo mester ta traduci tambe den un crecemento substancial di nos reservanan di divisa. No ta un secreto, pero e unico gobernacion cu a logra crece y mas cu redobla nos reservanan di divisa tabata Gabinete Oduber  cu a laga esaki na 1475 miyon florin na 2009, despues cu el a haya esaki na solamente 660 miyon florin na 2001. Y durante e ultimo 5 añanan di Gabinete Eman nos reservanan a ser reduci te na 1174 miyon florin. Pues 300 miyon florin menos den 5 aña di tempo! Riba e grafico adhunto partido MEP ta presenta e desaroyo di nos divisanan.

Bono y mas bono
Pero locual ta mas preocupante ainda ta cu durante e ultimo 3 lunanan di 2014, nos reservanan di divisa a aumenta pa gran parti debi na fiansanan cu gobierno a haci den exterior, e.o. na Oktober 2014 e reservanan a crece cu Af. 127.8 miyon y cu tabata principalmente asocia cu e emision di Af. 93.1 miyon (USD 52 miyon) di bononan (fiansanan) di gobierno riba mercado internacional. E mesun cos a sosode na December ultimo y pa cual Banco Central a raporta den su relato siman pasa: “E expansion di Afl. 19,1 miyon den e reserva di divisa netto na December 2014 tabata debi primordialmente na entrada di Afl. 26,3 miyon (USD 14,7 miyon) relata na e emision di bononan di gobierno”.

Un AVP sin vision
Asina un y tur por mira cu e maneho cu e gobierno di AVP ta hiba riba tereno di turismo no ta dunando su frutanan pa loke ta expansion di nos reservanan di divisa y pa cual mester constata un stagnacion desde 2011 caba.Y ta mustra claramente tambe cu den un forma ficticio - debi na e fiansanan riba mercado internacional - cada tanto luna e reservanan di divisa ta crece un tiki y pa e luna siguiente esaki bolbe reduci. Aki mester trece padilanti loke e rapport di Fitch na juli 2004 a constata, esta cu “e reservanan internacional a cay cu 15% te na 654 miyon dollar of 3.1 luna di pagonan externo den 2013”.

Pues ta keda demostra cu e gobierno di AVP no tin ningun vision tanto riba tereno economico, financiero como tambe monetario. Un fracaso total!

Expresionnan haci den e articulo aki no necesariamente ta refleha opinion di ArenaPoliti.co