Durante e encuentro na Parlamento cu e ehecutivonan di Utilities y WEB riba e tema di hedging, sr Jansen cu ta na cabes di e Hedging Team di WEB a recorda tur presente cu ningun hende tin un bola di crystal pa por premira futuro. E Mercado di crudo ta uno volatil, pues e prijs pa bari di crudo por cambia cu dia sin cu por sa 100% con grandi e cambio aki ta bay ta. Nos ta di acuerdo cu ningun hende por premira futuro, pa e motibo aki ta imcomprendibel con por ta posibel cu WEB a hedge full su necesidad di heay fuel oil (HFO) pa henter 2015 y 2016 den apenas un luna di tempo. Mester bin un splicacion kiko ta e motibo real cu a hedge asina agresivo den un periodo asina cortico.

Den augustus cu September 2014 a hedge tur HFO pa 2015 y 2016
Riba pagina 9 di e feitenonderzoek haci na WEB nos por lesa cu na augustus 2014 e Management di Web a pidi e Board di Supervicion pa bay di acuerdo pa e hedge e promer parti di e necesidad di HFO pa aña 2015. Na comienso di september 2014 e Management a pidi autorisacion pa e resto di 2015. Na fin di e mesun luna di september 2014, e Management a bolbe pidi autorisacion pa hedge, pero e biaha aki a pidi pa hedge e necesidad di HFO pa full 2016. Pues den menos cu un luna a hedge tur cos pa 2015 y 2016.

WEB mester splica e motibo pa cual a hedge asina agresivo
Hustamente pasobra cu ningun hende no por premira 100% sigur kiko lo pasa den futuro, nos no por compronde dicon WEB a bay hedge asina agresivamente den un periodo asina cortico. Ya na mei 2013 e revista Forbes a premira cu e prijs di crudo por baha te na 20 dollar pa bari y na juni 2014 mundo a cuminsa haya senial caba cu e prijs di crudo a cuminsa baha. Enbista di esaki, nos no por compronde e ansha cu tabata tin na augustus y september 2014 pa core hedge tur cos pa 2015 y 2016. Por ehempel, ta dicon no a tuma tempo y wak kiko e mercado a sigi haci na 2015 promer cu a hedge pa 2016? Haciendo un hedging pa 2016 dos aña promer ta indica cu e Hedging Team mester tabata basta sigur cu prijs di HFO lo subi. E siguransa aki no a bin dilanti durante nan presentacion na Parlamento. Pues nos ta spera di WEB un splicacion mas amplio riba e motibo real pa cual a hedge asina agresivamente den un periodo asina cortico anto sin un bola di crystal pa premira futuro.


15 maart 2015

Expresionnan haci den e articulo aki no necesariamente ta refleha opinion di ArenaPoliti.co