Den un mocion e Fraccion di MEP a pidi Parlamento den su totalidad pa por instrui Algemene Rekenkamer Aruba (ARA) pa por haci un investigacion profundo riba e asunto di hedging cu a tuma lugar na WEB y cu a afecta henter Pueblo di Aruba. E mocion aki no a conta cu e aprobacion di e Fraccion di AVP y como tal no por keda ehecuta. Pero esaki no ta impedi ARA pa por haci e investigacion aki riba su mes. Pesey na final di e reunion publico, nos a haci un apelacion fuerte na ARA pa investiga e asunto di hedging cu a perhudica full nos Pais.

Parlamento por pidi ARA investiga
ARA of Controlaria General ta un Colegio Halto di Estado cu su trabou ta ensera controla si e decicionnan cu Gobierno a tuma a wordo haci legalmente y si e fondonan cu a wordo usa, a wordo aloca conforme e meta proponi. ARA ta haci su investigacionnan na un manera independiente. Pero ley ta duna Parlamento di Aruba e posibilidad tambe pa pidi ARA pa por haci un investigacion riba nan peticion. Mirando e hecho cu e rapport traha riba e asunto di hedging no tabata completo, no a investiga e envolvimento di Utilities y Gobierno, nos a urgi Parlamento pa bay di acuerdo pa instrui ARA pa haci e investigacion na un forma completo pa asina Pueblo por haya sa kiko a bay robes. E asunto di hedging na WEB a bay robes y esaki a perhudica full nos Pueblo. Gobierno y Utilities tambe a hunga un rol grandi den e toma di decicion pa haci hedging, pesey ta mas cu husto pa nan rol tambe wordo investiga.

Fraccion di AVP cu hopi excusa pa no investiga gobierno
Ta di lamenta cu e Fraccion di AVP a bin cu yen di excusa pa no bay di acuerdo cu e investigacion di ARA. Nan a keda insisti cu ta algun siman pasa nan a pidi Gobierno via mocionnan pa investiga e asunto di hedging y cu ainda Gobierno mester bin duna cuenta na Parlamento. E Fraccion hasta a bay asina lew di insinua cu e peticion di investigacion haci na ARA ta descredita nos compania nacional WEB, lo ta un falta di respet pa ARA y un minamento di autoridad di Parlamento. Puro excusa fofo di Fraccion di AVP pa no investiga e rol di Ministernan De Meza y Eman y tampoco e rol di Utilities den e asunto di hedging. Pasobra ken por kere cu Gabinete Eman lo laga investiga su mes?

Apelacion pa ARA investiga asunto di hedging
E hecho cu e mayoria den Parlamento no a bay di acuerdo pa ARA investiga e asunto di hedging, no ta kita cu ARA riba su mes por haci un investigacion riba e problema aki. Pa e motibo aki nos ta haci un apelacion fuerte na e profesionalnan di ARA pa haci un investigacion profundo riba e asunto di hedging cu a tuma lugar na WEB y trece na claridad e rol cu Utilities y Gabinete Eman a hunga den toma di e decicionnan cu na fin di dia a perhudica full nos Pais. Nos ta confia cu ARA no lo laga e Pueblo di Aruba na caya.

21 april 2015

Expresionnan haci den e articulo aki no necesariamente ta refleha opinion di ArenaPoliti.co