Den un comunicado anterior nos a trece padilanti cu e implementacion di bazv riba bbo tawata un blunder cometi contra e pueblo pasobra a resulta cu ta cobrando y facturando esaki na un forma robes perhudicando e consumidor. Servicio di impuesto hasta e propio minister di finansas sr. Bermudez a confirma cu e cobransa di e impuestonanxr ariba menciona no ta sosodiendo manera mester ta y cu e ley ta wordo aplica robes.

Nos por corda cu na comienso di februari Camara di Comercio (KvK) a manda un carta tocante e confusion cu a reina encuanto e aplicacion di BAZV. Realidad ta cu BAZV ( & BBO) nunca mester a wordo calcula riba ningun factura pasobra e no ta un impuesto riba e consumidor. Apesar cu tin algun comerciante (cubo por conta riba bo mannan) mayoria ta esnan cu ta keda aplike na un forma incorecto asina perhudicando e consumidor. Pesei nos ta keda ripiti y pone enfasis riba e hecho cu BAZV y BBO no ta un sales tax, pero un impuesto riba e benta mensual di e comerciante.

E tempo ey e mandatario a duna di conoce cu departamento di impuesto lo ta preparando un campaña di control y cu pronto e ekipo di control aki lo subi caya pa controla den comercio si e leynan ta wordo aplica segun ley. Pero obviamente nada no a sosode pasobra 2 luna a pasa y te ainda lo incorecto ta tumando lugar sin cu niun hende ni Minister Bermudez a durf di para e inhusticia aki y "trek e recht"! Pa colmo no tin ningun tipo di sancion tampoco pa esaki.

Nos di oposicion ta lamenta cu pueblo keto bai ta esun cu ta wordo perhudica pa motibo cu no tin control manera mester ta ni tampoco un maneho pa actua y proteha un pueblo contra abuso!

Expresionnan haci den e articulo aki no necesariamente ta refleha opinion di ArenaPoliti.co