Algo cu pueblo mester tene cuenta cune ta e hecho cu no ta por nada Raad van Advies a duna un conseho negativo riba presupuesto 2015. E raport sin duda algun na un manera basta amplio ta splica pakiko e presupuesto 2015 no ta apto pa manda parlamento pe wordo trata. Pesei cu hopi asombra nos a tuma nota di un comunicado di lider di fraccion di AVP titula “ presupuesto ta keda den cuadro financiero”. Contrario na e ponencia cu e presupuesto 2015 di pais Aruba ta den cuadro financiero a resulta cu hustamente Gabinete  Eman ta desvia di su propio plan di “balanced budget akkoord” pasobra ta surpasa cuadronan financiero conoci. Ta conoci cu Gabinete Eman a cuminsa aplica e plan jama “balanced budget akkoord” den presupuesto 2014. E plan aki ta encera un sistematica unda cu gobierno lo a mara su mes na un maximo di 1.350 miyon di gasto anualmente ( durante 4 aña largo) considerando cu e entradanan di pais Aruba aña pa aña lo bai crece  tumando 1.150 miyon como base. Importante pa remarca di e sistematica aki i ta cu si pais Aruba genera mas entrada esaki no mester nifica cu mester bai crea mas gasto. Di otro banda si haya menos entrada lo no mester bai hasi un reduccion adicional (sigui corta gasto).Den e proximo alinea nos lo pone enfasis riba e parti cu Gabinete Eman mes no ta atene na su propio plannan y esaki ta wordo treci dilanti door di Raad van Advies.

Den parafo 2.2 di e rapport e organo di conseho a indica cu entre otro  introduccion di BAZV, institucion di un Aruba investment fund compaña cu cobransa di transaction tax na 2016 y privatisacion di departamento di aviacion civil ANSA ta laga gobiern KIBRA su propio acuerdo. Awor sigur bo ta puntrando bo mes dicon? Ta asina cu Raad van Advies a subraya cu si e modificacionan ariba menciona a wordo incorpora segun e acuerdo di balanced budget akkoord lo nifica cu Gabinete Eman ta surpasa e limite 1.350 biyon di gastonan. Riba pagina 4 di e rapport bo lo tuma nota cu tur aña (2015-2018) e diferencia ta keda bira mas grandi.

Presupuesto  2015 ta ilustra un deficit financiero di 183 miyon cual den percentahe ta 3.7% di nos producto domestic bruto (GDP). E deficit aki automaticamente ta ocasiona e crecemento di nos debe nacional. Relaciona cu e punto aki e organo a pone enfasis tambe riba entre otro gastonan di interes cu ta keda crece. Na 2014 gastonan di interes tawata aproximadamente 188.8 miyon (den percentahe 16.5% di entrada di nos pais)  mientras cu pa 2015 esaki a crece y bira 202.3 miyon florin (den percentahe 17.4% di entrada di nos pais).  E crecemento di gastonan di interes cu 13.5 miyon ta nifica un crecemento di 7% extra na gastonan di interes! Segun e presupuesto nos debe nacional ta sigui crece y ta 81.7% cual manera conoci ta for di proporcion. Bo por conclui cu ta continua surpasando e limitenan proponi y cu contrario na loke a wordo declara cu Presupuesto 2015 ta cai AFOR di cuadro financiero proponi door di propio Gabinete Eman strobando asina e desaroyo pa yega na un presupuesto balansa.

Expresionnan haci den e articulo aki no necesariamente ta refleha opinion di ArenaPoliti.co