Awe 17 di April nos ta recorda con un acto sumamente bochornoso a tuma lugar 4 aña pasa, caminda malhechornan sin escrupulo y yena cu rabia y rencor a destrui e graf di nos Libertador Betico Croes. E tempo ey nos comunidad den forma energico a condena e destruccion aki, ya cu esaki tabata un falta di respet total pa nos gran luchador Betico Croes, kende a duna su bida pa logra libertad di nos pueblo y cu pa den su eterno soño e wordo trata di e forma baho aki. Hecho ta cu e destruccion di e graf di Betico no tabata un acto riba su mes, pero esaki tabata como resultado di tur e accionnan negativo cu constantemente a wordo hiba door di cierto politiconan envidioso, kendenan a haci y te ainda ta haciendo tur intento pa destrui e memoria di e gran estadista aki. Despues di e acto bochornoso den Santana di Santa Cruz, te cu awe no a cay ningun detencion, siendo cu tur hende sa cu e malhechornan mester wordo busca den esnan cu den pasado a susha henter Caya Betico Croes, esnan cu a cera e Caya aki na candal ora cu gobierno di MEP kier a cuminsa cu e embeyecimento den e area aki y esnan cu durante e huelga contra introduccion di BBO a destrui e graf di tata di un ex-Minister di MEP.  No mester lubida tambe e menasa cu a wordo expresa door di contrincantenan politico, despues cu e vlam eterno na e Plaza 12-8 a wordo paga y cu di biaha a tira tur culpa riba MEP, siendo cu ta algun marinier burachi a comete e acto di paga e vlam aki.

Pa partido MEP e acto bochornoso di profanacion di e graf di Betico 4 aña pasa ta keda imperdonable y e forma di sin respet aki contra nos Libertador siguramente no ta carga aprobacion di nos comunidad.

Finalmente famia di Betico Croes hunto cu partido MEP y henter pueblo Arubano a percura pa un di dos entiero tuma lugar, caminda cu tur honor y respet Betico a wordo hiba pa su ultimo lugar di sosiego, su lugar di eterno soño.

 

Expresionnan haci den e articulo aki no necesariamente ta refleha opinion di ArenaPoliti.co