Introduccion di impuesto indirecto ABB di 8%

Despues cu e lider di fraccion AVP, Baba Herde a perde e bataya pa loke ta su mentira flagrante cu ta partido MEP a trece CFT Aruba, awor e ‘gran experto’ aki a dicidi di cambia rumbo y subi su cabay di Reforma Fiscal. Lamentablemente Baba Herde ta 9 aña atrasa ya cu ta awor numa el a cuminsa elabora riba e asunto di introduccion di impuestonan indirecto den nos sistema fiscal. Awor Baba Herde den su comunicadonan ta papia asina bunita di tur e beneficionan cu e introduccion di impuesto indirecto (ABB di 8%) ta trece cune, pero den tur su declaracionnan su persona no ta menciona net nada di reduccion di impuesto directo cu su gobierno di AVP mester introduci pareu cu introduccion di e impuestonan indirecto.

Hende sa come y lubida
Esaki tabata e caso tambe tempo cu Gabinete Oduber a introduci e impuesto indirecto BBO di 3%. E tempo ey gobierno di MEP a reduci substancialmente e tarifanan di inkomstenbelasting, caminda por ehempel un trahador cu tabata gana 30 mil florin pa aña (2500 florin pa luna) a haya 108 florin extra den su salario tur luna (mira tabel adhunto). Un otro ehempel ta un empleado publico manera Baba Herde cu tabata haya 403 florin extra tur luna den su salario (4840 florin pa aña) debi na e reduccion di Inkomstenbelasting aki. Y anto ainda Baba Herde constantemente kier venena mente di pueblo cu durante gobernacion di MEP e empleadonan publico no a haya ningun florin extra! Hende sa come y lubida!

AVP a demoniza BBO
Pues ta remarcabel cu den tur e declaracionnan di Baba Herde pa loke ta e introduccion di e impuesto indirecto ABB, ningun momento so no a tende for di dje y ni for di gobierno cu nan lo bay reduci e impuestonan directo y p’asina tur trahador na Aruba lo keda cu extra placa den nan cartera tur luna, mescos cu a sosode na 2007 durante Gabinete Oduber. E tempo ey den tur declaracion di ex-Minister Nilo Swaen el a trece padilanti cu tur trahador na Aruba lo haya  reduccion di Inkomstenbelasting y cu nan lo keda cu extra placa den cartera cu nan mes lo dicidi kico nan lo haci cune. Asina mes e politiconan di AVP a demoniza e introduccion di BBO malamente y awe nan mes ta brasa cu e forma di cobra belasting aki. Cacho ta nenga weso pero ta weso mes e tin cu come! Maar het beestje heeft een andere naam gekregen.

Ta pesey lo ta bon pa proximo vez Baba Herde duna un splicacion amplio riba e asunto aki, ya cu pueblo lo no acepta un impuesto indirecto di 8% y riba dje cu nan lo no haya reduccion di nan impuesto directo.

Expresionnan haci den e articulo aki no necesariamente ta refleha opinion di ArenaPoliti.co