ORANJESTAD – Manera ta e caso ya pa mas di cuater aña, cada bes cu Minister President Mike Eman tin oportunidad, e ta bishita riba diahuebs un bario di e isla pa comunica directamente cu e ciudadano. Den e proceso aki, e mandatario ta pone e ciudadano na prome luga y pesey cu tur dedicacion y pasenshi ta scucha necesidad di e habitantenan pa nan bario, nan opinion, deseonan y tambe cualke critica cu nan por tin. E siman aki Prome Minister Eman a reuni cu bisiñanan di Tanki Flip y Matadera. E bon bini tabata uno caluroso pa e mandatario.

Bus di Salud tabat’ey, mescos cu personal di Serlimar, Gele Koorts Muskietbestrijding y BoBario pa asisti e comunidad den cualkier manera cu ta necesario y na nan alcance. Serlimar ta ocupa su mes cu e bario henter siman haciendo limpi y yuda esnan den e bario cu cualke problema cu nan por soluciona. Di su banda, Prome Minister Mike Eman ta duna un y tur presente atencion y respet. El a cuminda e grupo sinta wardando nan beurt pa check salud, a pasa saluda gerencia y personal di un negoshi nobo den e area. Asina el a cuminsa cu e ruta di casnan caminda nan ta ward’e ansiosamente.

Den e recorido por a mira con personanan a prepara pa e Accion di Bario dor di, entre otro, haci peticion pa e cosnan mas importante cu e bario mester, manera luz publico y drechamento di caminda. Otronan a pone e sushinan cu nan kier deshaci di dje pafo y personal di Serlimar a pasa recohe esakinan.

Na final di e mainta, Prome Minister a sinta combersa cu un grupo di ciudadano reflexionando riba tur e puntonan treci dilanti y con por brinda un solucion na cada un. Habitantenan ta aprecia masha hopi e oportunidad cu na Aruba so tin, di papia directamente y habri cu e prome mandatario di e isla riba ideanan cu ta mehora e calidad di bida den e bario.

Minister President Mike Eman a comenta cu e reaccion cu e ta haya for di e pueblo ta cu nan ta realisa y wak e diferencia entre e gobierno di pasado y esun di awo cu ta yega cerca, scucha y haci. Ta pesey den dos ocasion Aruba a duna e maneho di Gabinete Mike Eman su seyo di aprobacion di un manera hopi cla.

Expresionnan haci den e articulo aki no necesariamente ta refleha opinion di ArenaPoliti.co