ORANJESTAD – Un di e trabounan cu Prome Minister ta haya hopi importante pa haci ta tuma tempo pa cana den bario y reuni cu bisiñanan di bario. Esaki ta algo cu hopi ta aprecia pa motibo cu normalmente politiconan ta miranan den temporada di eleccion unicamente, pero Prome Minister ta haya importante cu durante su gobernacion e por keda den contacto cu pueblo pa scucha preocupacion, sugerencia y ideanan pa nan bario y tambe Aruba en general. E siman aki a topa cu Prome Minister den bario di Tanki Flip y Matadera.

E mandatario ta splica cu semper e ta aprecia e forma positivo di e habitantenan, sea cu nan tin critica of elogio, pa ricibie den nan bario. “E bishitanan ta algo cu e habitantenan di e barionan ta aprecia enormemente. Durante hopi aña a conoce gobernacionnan unda cu necesidadnan hopi importante di nos comunidad no a wordo scucha y esey ta e motibo pa e forma con nos comunidad ta brasa e forma di yega cerca nan,” Eman a bisa na final di e bishita.

Prome Minister a bisa cu esnan cu ta considera e bishitanan aki “tempo perdi”, ta papia mas bien for di punto di bista politico. “Kisas e ta fastioso cu durante e periodo di nan gobernacion no a duna e comunidad e tipo di atencion aki y awor si. Logicamente nan tambe ta realisa cu comunidad ta wak e diferencia entre un Gobierno cu ta bay bario, ta scucha y haci e cambionan den e barionan, y otronan cu nunca a bishita nan.” E ta marca e diferencia den e forma di gobernacion cu tabatin anteriormente y awe pa cual e comunidad na dos ocasion caba a duna su seyo di aprobacion den un forma hopi cla, el a agrega.

Tur siman Prome Minister ta wordo compaña den e Accion di Bario di funcionarionan di SERLIMAR y DOW cu ta encarga cu aspectonan di limpiesa, di funcionarionan di GKMB cu ta percura pa control pa entre otro sangura di Dengue of Chikingunya, y trahadonan di Team BoBario y trahadonan social, pa atende cu e preocupacionnan of problemanan cu e ciudadanonan por ta confronta. Algo cu e habitantenan sigur ta aprecia ta e bishita di Bus di Salud, cu ta haci diferente test basico y duna conseho na esnan cu acudi cerca nan.

Mayoria di e peticionnan cu Prome Minister ta ricibi ta relaciona cu mehoracion di e bario mes, asina ta hopi biaha ta propone pa area pa habitantenan por topa (parke); cancha deportivo, luz of asfalt pa camindanan. Tur e cambionan aki ta haci cu e comunidad ta mira cu nan ta wordo scucha y despues mira tambe e cambionan importante cu e bario ta pidi p’e, Eman a duna di conoce. “Tin biaha mesora y den otro casonan e ta tuma un tiki mas tempo,” el a agrega.

Expresionnan haci den e articulo aki no necesariamente ta refleha opinion di ArenaPoliti.co