Prome Minister Eman durante bishita na Tanki Flip y Matadera 

ORANJESTAD – Un di e aspectonan cu a wordo papia di dje door di tanto habitantenan di Tanki Flip como Matadera ta e deseo pa miho iluminacion pa nan bario y tambe creacion di puntonan di iluminacion nobo. Esaki ta un preocupacion cu Prome Minister Mike Eman por a contestanan mesora cu e cambio ta na caminda.

Instrumentonan cu ta brinda mas siguridad, manera miho iluminacion, ta algo cu a wordo señala door di diferente habitante, entre otro Richard Croes. El a splica cu a cuminsa haya algun luz nobo caba den e bario. Pero tambe e habitante a expresa satisfaccion cu e mandatario ta cana cu funcionarionan di SERLIMAR y asina recoge e sushinan cu tin tira den bisindario. E mesun siman cu e mandatario ta bishita un bario, e ekiponan di limpiesa tambe t’ey durante un siman largo pa coopera pa haci e bario bunita y recoge sushi.

Den direccion di Gobernacion tambe Croes kier a manda palabra di reconocemento. “E gobierno ta moviendo y awor por mira unda bo placa ta bay, entre otro door di embeyece e isla.” Y a agrega cu e ta compronde cu por traha riba cierto cos y cu den otronan areanan mester corta den gastonan. Sra. Raisa tabata contento di por a haya chens pa topa cu e mandatario y haci’e pregunta. “Mi ta contento cu e ta pasa den e barionan ... y mi ta contento cu e trabou cu Gobierno ta haciendo.” Sra. Raisa a expresa masha aprecio pa e trabou cu Gobierno di Gabinete Mike Eman II ta haci den e barionan, pero principalmente pa e pais su bienestar.

Prome Minister Eman a splica e habitantenan cu Gobierno a firma MOU cu e compania di ELMAR pa cambia tur e luznan (iluminacion) rond di Aruba e tipo di LED, cu ta uno hopi mas eficiente y ta duna mas sentido di siguridad. Pero alabes a pidi ELMAR pa ordo 3000 luz adicional, cual lo ta destina pa e areanan unda cu falta iluminacion. “Asina cu nan yega e programa di Luz den Bario lo tey atrobe,” Eman a duna di conoce. 

Expresionnan haci den e articulo aki no necesariamente ta refleha opinion di ArenaPoliti.co