ORANJESTAD: Nos ta yegando na e final di un otro aña parlamentario y mirando bek riba e aña cu a caba di conclui, ta duel mi hopi di mira un Parlamento cu sistematicamente ta tuma decisionan robes y unilateral, hincando nos pais den un decadencia cronico. E gobierno aki lo pasa pa Aruba su historia, como e “Fracaso Perfecto di Mike Eman”.

Por compara tur e decisionan tuma pa Parlamento number 9 di Pais Aruba cu e “Bay of Pigs Invasion” den tempo di Kennedy (d.f.m.) of manera e ta conoci den Latino America, e “Invasion de la Playa Giron”. Mike Eman y su 13 parlamentarionan a invadi parlamento di Aruba na 2013 engañando Pueblo cu promesanan di campaña cu nan no por cumpli cune. A priminti Aruba su Pueblo di transforma nos baranca den un isla di 5 strea, cu barionan di 5 strea y un comunidad feliz. E realidad despues di 6 aña di gobernacion desastroso di AVP ta, cu nos no ta un pais di 5 strea, nos barionan no ta di 5 strea y nos Pueblo ta mas dividi cu nunca. Mike Eman a kere cu su plan pa inyecta placa den economia (a la Paul Krugman) den momentonan di austeridad lo a traha, pero e realidad ta cu mescos cu e Invasion de Playa Giron, Mike Eman su plannan tabata sumamente mal organisa, a maluza e confianza di tur stakeholders na Aruba por medio di "Dialogo Social" y e no tabata tin un plan contingencia encaso su filosofia no duna e resultadonan spera. Lo mas tristo ta, pa mira cu NINGUN di e 13 parlamentarionan di AVP tin e curashi na acepta cu nan lider a faya!

Sr. Mike Eman a bende Aruba un ideologia di sostenibilidad durante campaña. E la bende Pueblo cu e lo haci Aruba un pais berde y 100% sostenibel. Pero e realidad despues di 6 aña ta, cu ni e calculacionan pa hedge prijsnan di crudo pa garantisa un prijs abou di awa y coriente e no por a maneha. Nos tur ta pagando un dineral na awa y coriente danki na e mal maneho di e gobierno di Mike Eman. Y por sigui mira has ta den un caso asina, cu e 13 parlamentarionan di AVP ta prefera na scohe pa un silencio mortal! Pues e dolor di Pueblo pa nan ta secundario.

Parlamentario Besaril ta conclui bisando cu ela constata cu poder a subi y pasa Prome Minister Mike Eman su cabes. “Ela subi un sero cu e mes no sa con pa baha di dje awor! Esaki sa ta un fenomeno comun den hendenan cu no por deal cu poder!  Un y tur por ripara cu e Minister no ta preocupa en lo absoluto pa e Pueblo di Aruba y a yega asina leu di hasta entrega parti di nos autonomia na Hulanda y organisa un fiesta su tras pa celebr’e tambe, djis pa mantene su mes y su gobierno den un posicion di poder!

“Mi consuelo ta cu den e era cu nos ta biba aden, yega na poder ta facil pero perde poder ta bay mes un lihe. Den e era aki di digitalisacion y media social ta obvio cu maske e 13 parlamentarionan ta den silencio y no por bay contra nan lider, nan campañadonan, votadonan fiel y e Pueblo Arubiano si a cuminsa realisa poco poco cu tur e ideanan, planan y promesanan di campaña a fracasa y a resulta di ta soñonan y idealnan irealistico.  Ningun gobierno ta dura pa semper y nos sistema democratico lo demostra e gobierno aki cu nan ta e gobierno mas decepcionante cu nos isla a yega di conoce!" Parlamentario Besaril a termina.

Expresionnan haci den e articulo aki no necesariamente ta refleha opinion di ArenaPoliti.co