Un di e tareanan di un gobierno ta pa stimula desaroyo economico. E ultimo 6 anjanan nos por a mira lo contrario. Prome tabata e comercio na San Nicolas. Gobierno no a actua diligente cu nos refineria cu consequencia cu e refineria a dal sera y te awe no a habri mas. Esaki a trece cu ne cu den un tiro benta a cai y un tras otro negoshinan a sera. Mike Eman Prome Ministro y lider di AVP a bin cu pintamento di muraya, carnival village,  Carubbian Festival y a bin cu facilidad di belasting. Na 2015 nos por constata cu ningun di e accionan aki a yuda y e perspectiva pa San Nicolas ta negativo. Na Oranjestad nos por mira un desastre den tres etapa. Den e prome etapa gobierno a crea un chaos total den trafico na momento di trabaonan di reconstrucion den centro di Oranjestad. Central den e esaki tabata e construcion di e caminda pa e tram core. E segundo etapa tabata e introducion di e tram mes. Ningun meta di e tram a ser logra. Turistanan no ta usa e tram como transporte pa bin haci compra sino ta usa e tram pa keiro. Awor e situacion den centro di Oranjestad a drenta su tapa number tres cu e introducion di e parkeermetersnan. Cada etapa menciona a trece un caida den comercio. Por ser bisa cu lamentablemente hopi comercio tradicional a bai perdi. Si e comercio den etapa dos ya tabata minimo awor segun parlamentario mr. Juan Ady Thijsen practicamento Mike Eman Prome Ministro y lider di AVP a caba cu e comercio den centro di Oranjestad den etapa tres. Den weekend tur hende por a mira con keto e comercio tabata ta y ainda falta otro factornan bin acerca manera introducion di un ABB di 8% y un transferbelasting. Segun parlamentario mr. Juan Ady Thijsen comercio tambe mester uni su mes na e Frente Uni pa hunto nos atende problemanan pisa cu ta azotando nos pais.

Expresionnan haci den e articulo aki no necesariamente ta refleha opinion di ArenaPoliti.co