FRACCION DI MEP A BISHITA IMSAN 

SAN NICOLAS – Fraccion di MEP e siman aki a reuni cu director di Imsan sr. Joel Rajnherc, hunto cu sra. Monica Nuboer y sr. Greg Croeze pa asina haya mas informacion riba e proyectonan cu tin na IMSAN y mas principal, e proyectonan den futuro.
IMSAN ta un proyecto cu a cuminsa durante Gabinete Nelson Oduber 4, cu planes tremendo pa futuro. E mester a desaroya den un centro di cardiología y di diabetes, y poco poco den un facilidad cu cama pa pacientnan keda interna.
Sin embargo ora gobierno a cambia, AVP a boycotia tur e planes, y awe por mira con a stroba un desaroyo cu por a bira algo hopi bunita na IMSAN. Awe cuidadanonan di San Nicolas, Brazil, Savaneta y Pos Chikito lo por a haya cuido mas adecua. Y e realidad awe ta un edificio cu ta wordo utiliza pa solamente 60% y camanan warda sin por wordo usa. Ta realmente un dolor pa wak esey.

IMSAN tin planes grandi pa e siguiente dos anjanan. IMSAN kier desaroya un centro oncológico, pasobra ta hopi hende ta bai den exterior pa tuma radiación y tratamento di cáncer, y si nan por keda Aruba esey por ta mas beneficioso pa nan y nan famia. Tambe IMSAN kier brinda salanan di operacion mirando e lista largo di espera cu tin pa operacion na dr. Horacio Oduber Hospital.

IMSAN tin practicamente tur e facilidadnan pa por hasi e proyectonan aki, hasta mas grandi y mas mihor cu e hospital actual, hasta despues di su renobacion. Único cos cu falta ta un aprobacion di gobierno.

“Nos a keda hopi impresiona despues di a haya e guía den e edificio. E orguyo di ta forma parti di e partido cu a hasi esaki posible, partido MEP, ta mas grandi cu nunca. Mi ta gradisi e director di IMSAN pa tuma tempo pa splica nos di e planes, y pa mustra cu tur esey ta posible. Mi ta lamenta si cu e burocracia ta tuma asina largo, y mi ta spera cu e tema aki di cuido di salud y IMSAN haya prioridad pronto di e gobierno aki. E gobierno aki tin placa pa cantidad di cos cu no mester haya prioridad. Miyones ta bai den cabay blauw, caretera di 4 via, festival di musica. Dicon no por pone algun miyon un banda y inverti den mihor cuido di salud?”, lider di MEP Evelyn Wever-Croes ta puntra.

Expresionnan haci den e articulo aki no necesariamente ta refleha opinion di ArenaPoliti.co