EVELYN WEVER-CROES DESPUES DI BISHITA NA IMSAN 

STA CRUZ --  Lider di MEP Evelyn Wever-Croes a elabora riba un reunion cu e fraccion geel a tene e siman aki cu director di IMSAN dr. Rajnherc. “Mi a sintimi berdad hopi orguyoso di ta forma parti di e partido cu a hasi e proyecto aki posible. Un vision tremendo pa San Nicolas tin su propio hospital, y mi ta kere den e vision ey ainda. Ademas awor kier expande cu salanan di operacion cu ta corta e tempo di espera mucho largo cu tin pa un hende opera.

Y e parti mas importante, e departamento di oncologia, ya patientnan di cancer por haya nan tratamento contra cancer aki na Aruba mes. Esey sigur lo trese un alivio serca pacientnan di cancer y nan famia. Ami a pasa aden, y mi sa con duro e ta.

Nos a reuni na IMSAN pasobra manera anuncia, bo lo no mira fracción di MEP den Parlamento mas manera antes. Nos lo acudi solamente na reunionnan cu ta hopi importante pa nos pais, y cu ta mishi cu cartera di nos pueblo. No pidi nos bai sinta den airco henter dia ta hasi nada, pasobra ta pueblo a pone nos den Parlamento y nos tin cu ta mas cerca di pueblo. Si parlamentarionan di AVP kier sinta den airco hunga riba Facebook, ta nan asunto. Nos ta den pueblo, buscando solucion pa e problemanan mas urgente di nos pueblo.

Durante nos reunion na IMSAN nos mes por a mira con e proyecto ta hopi avanza, pero mientras tanto tin 6 anja para, pasobra desde cu AVP a drenta den gobierno, nan a para e desaroyo aki mesora. Esaki ta lamentable, y ainda tin cama completamente nobo den kambernan den IMSAN, wardando pa e desaroyo sigi.

Mi ta lamenta di mira cu capricho político ta pone cu e proyecto di hospital pa San Nicolas no por a sigi, pero mi ta mas determina cu nunca pa lucha pa San Nicolas haya su hospital. Pueblo di pariba di brug merece mihor, y especialmente e pueblo di San Nicolas merece cu solo ta sali pa nan tambe”, palabranan di líder di MEP Evelyn Wever-Croes

Expresionnan haci den e articulo aki no necesariamente ta refleha opinion di ArenaPoliti.co