Den e ultimo siman cu a transcuri pueblo por a nota cu Gabinet eman a trata na bende e concepto di parkeer na cuidadanonan pa medio di diferente comunicadonan. Loke nan a trece padilanti ta entre otro con e Sistema di parkeo na Corsow ta funciona. Notabel ta cu a promociona solamente e parti positivo di esaki y pinte cu e ta ideal pa nos pais.  Mester enfatisa cu ta tin un cantidad di aspecto y facetanan di implementacion cu a bai completamente robes. Esun cu no kier kere cu e projecto aki a perhudica Caya afectando benta y ta un peso financiero pa e clase trahador ta invita pa bai bishita tur area di parkeermeters pa combersa cu comunidad trahador y comerciantenan.   E ta obvio cu a core ehecuta sin cu a tuma e tempo necesario y e estudionan rekeri pa planificacion y implementacion di parkeermeters.

Pa loke ta trata e comparacion hasi cu Corsow den un principio Aruparking bou mandato di minister di Transporte mester a cuminsa ta honesto cu pueblo informando cu na Corsow e tarifa pa parkeer ta 0,50 cent pa mey ora y 1 florin pa ora. Na Aruba e tarifa aki ta 2x mas hopi dus 1 florin pa mey ora y 2 florin pa un ora. E cobransa of multa cu tin cu paga na Corsow pa kita e wielklem ta 25 florin mientras cu na Aruba esaki ta 3x mas hopi 75 florin. Loke nan a falta pa menciona cu tin un un area serca di tiendanan cu por por para gratis. Mientras na Aruba a menciona lineair park como parkeo social pero e realidad ta cu esaki no ta asina practico pa esnan cu mester labora den centro di Oranjestad.

Den prensa ta wordo bisa door cu a crea mas espacio pa parkeer esei a pone cu a e ta posibel pa parkeer mas tempo pa menos placa. Berdad e slogan ta uno cu ta sona atractivo pero realidad ta cu gran cambio esaki no ta trece cune pasobra e tarifa despues di un cierto tempo toch ta keda 2 florin. Dus toch esaki lo por bai keda molestia y tin su efectonan negativo pa e comunidad yega centro di Oranjestad.  Pero si pueblo tuma bon nota na e inicio di introduccion di e projecto tawata papia di monedanan di florin so cu bo por a tira den machinenan. Awor diripiente ta propaganda cu e ta posibel pa tira 25 cent den machine cu automaticamente ta lagabo lansa e pregunta: dus bo kier a test te con leu bo  por cobra pueblo mas placa pa parkeer? Algo cu tambe cu tampoco bo no ta tende mas ta e 15 minuut “vrij parkeren” cu a wordo promociona e promer dianan.Den cierto casonan e ta poco absurdo pa paga pa parkeer ora di bai lanta placa di atm of ora abo djis mester busca algo den fraccion di minuutnan.  Kizas Aruparking por a pensa den laga 30 ora gratis na cuminsamento pa despues cuminsa cobra

Awor pueblo di Aruba por a tuma nota cu Gabinete Eman no a keda contento cu ta ranca placa for di Oranjestad so y lo bai den areanan di hotel tambe. Dus den e areanan aki tambe esnan cu un salario abou lo bai confronta nan mes cu un extra peso financiero. Actualmente segun un business case hasi den centro di playa tin 1533 parkeervakken y na caminda High Rise area lo tin 419 parkeervakken. E diferencia den entrada di parkeermeters di area Highrise por ta mas halto pasobra e ta valido 24 ora pa dia mientras e parkeermeters den centro di Oranjestad lo traha di 7 am pa 7pm. Akinan e ta bisto cu e ansha pa placa ta continua poniendo parkeermeters den mas area manera High rise area.

Pa clausura e ta importante pa trece padilanti cu enbes di regula parkeo a  causa miedo y indignacion den centro di Oranjestad den sentido cu na e momentonan aki no tin lugar mas pa para trahadornan y automaticamente nan ta haya nan mes forsa pa para un caminda kizas cu no mag kedando cu miedo cu nan auto por wordo “geklem “ mas confronta gastonan di tow cu ta rond di 225 florin total. Apesar cu a reduci e suma pa trahadornan di 75 florin pa 60 florin pa ganja wowo di hende e no ta kita e hecho cu esaki ta keda halto y ta un forma un peson financiero di 720 florin pa anja!  Pa pueblo henter e proceso y medida desproporcional aki ta keda causa iritacion y incomfortabilidad.

Expresionnan haci den e articulo aki no necesariamente ta refleha opinion di ArenaPoliti.co