Un plataforma pa artistanan hoben conecta cu otro islanan den Caribe y paisnan cercano  

Diahuebs atardi Minister Otmar Oduber a reuni cu Elvis Lopez y Maria Silva pa repasa den detaye e proyecto di Caribbean Linked.

E reunion a bay den hopi bon ambiente y tanto Sr. Lopez como Sra. Silva a sali hopi contento di por a haya e atencion y sosten di Minister Oduber pa cu e proyecto special aki.

Elvis Lopez a indica cu Caribbean Linked ta un proyecto cu a cuminsa cune na Aruba cu ta pa conecta nos mes cu tur e otro islanan den Caribe y paisnan cercano. E ta un promocion pa e artistanan hoben den Caribe pa por drenta den contacto cu hendenan cu ta skibri riba arte, cu ta critico di arte y ta invitanan pa cierto exposicionnan na diferente pais. Tambe e ta un promocion pa e artista hoben di Aruba pa drenta den contacto cu e personanan aki y asina nan por skibi riba nan y hendenan rond mundo por lesa riba nos artista. 

Cu otro palabra Caribbean Linked ta un plataforma pa e artistanan hoben por haya e contactonan internacional y por promociona nan mes aki riba.

Elvis Lopez a bisa cu Minister Otmar Oduber ta gusta e programa aki y ta bay sostene otro aña mas hopi ainda. Maria Silva di su banda a indica cu ta hopi importante pa mira cu Minister di Cultura ta sosteniendo e espacionan cultural y actividadnan cultural. “E manera cu el a habri porta pa Atelier ta un aire fresco pa nos dor di por conta cu su sosten. E ta wak constantemente kico nos ta haci y tambe con e por yuda nos conecta cu otro entidadnan priva y gubernamental pa nan tambe wak con importante arte ta pa nos como comunidad”. 

Expresionnan haci den e articulo aki no necesariamente ta refleha opinion di ArenaPoliti.co