Observando e celebracion di Luna di Enseñansa aki na Aruba, y como un docente di profesion, mi tin cu hasi enfasis riba e necesidad cu nos tin pa un liderasgo efectivo den nos sistema educativo. Nos muchanan merece y mester e mihor educacion cu nos ta capacita pa duna nan, y pa logra esaki nos maestronan mester di haya e hermentnan necesario pa por educa nos studiantenan na un manera apropia.

E ta un lastima di mira cu Gobierno di AVP ta prefera di gasta placa den hasi show mediatico, na lugar di inverti e placa ey den educacion. Tur dia mi ta scucha docentenan ta keha cu tin falta di recurso y material pa duna les na nan alumnonan. A corta asina tanto den presupuesto di educacion, cu ni buki e alumnonan por haya mas pa sigi nan lesnan. Aworaki e maestronan ta hayanan obliga di saca copia di e bukinan pa e muchanan por haya, pasobra placa no ta yega pa cumpra buki.
Pero di otro banda, e suma di schoolgeld of cualkier otro gasto escolar si a bira mas hopi. Alumnonan di scolnan mas avansa ta hayanan obliga di paga sumanan cuantioso pa por sigi nan estudio.
Y asina tin hopi mas carencia urgente den nos sistema educativo na Aruba cu mester di atencion inmediato, pero Gobierno no ta interesa pa soluciona esakinan. Ta prefera di aloca e placa den proyectonan menos urgente pa asina e grupito liga na AVP keda beneficia atrobe, y sigi lucra riba custia di pueblo.

Nos como Parlamentario y den calidad di representante di pueblo, tin e responsabilidad di recorda Gobierno cu e ta den obligacion pa hasi lo necesario pa mantene su pueblo educa, cuminsando na esnan cu ta atendiendo scol ainda.
Dunando prioridad na nos studiantenan, Gobierno mester sigura un futuro prominente pa henter nos comunidad.
Tin hopi carencia den nos sistema educativo, y Gobierno di AVP claramente no ta dunando un interes real na e problemanan mas preocupante cu ta reina den nos scolnan tur rond di Aruba.
Pa es motibo aki, nos como Partido MEP ta compromete nos mes cu pueblo di Aruba di duna educacion su prioridad mereci. Nos ta kere firmente cu un pueblo educa, ta un pueblo liber cu hamas por wordo engaña. Educacion no ta un luho, e ta un necesidad!

Expresionnan haci den e articulo aki no necesariamente ta refleha opinion di ArenaPoliti.co