E aumento di schoolgeld di SKOA a causa un ola di reaccion den comunidad, na prome lugar debi na e aumento drastico pa 250 florin. Pero no esey so, sino e splicacion cu a wordo duna pa cu e aumento a causa mas reaccion ainda. Sinembargo, locual a lanta rabia di berdad den comunidad, ta e hecho cu e minister di ensenjansa no a mustra ningun interes pa atende cu e asunto y deliberadamente a laga e problema escala. SKOA a anuncia e aumento aki 3 luna pasa caba, sinembargo di parti di e minister no a tuma ningun accion. Awor cu cuidadanonan a lanta contra e medida aki, e minister a tuma accion y ta tratando na evita e aumento drastico aki. Tin un dicho ta bisa ‘miho laat cu nunca’, y esaki ta aplicable den e caso aki. E minister por a evita cu e problema a escala, si el’a tuma accion prome.

Hecho ta cu SKOA a wordo afecta severamente anja pasa ora cu Gobierno no a retene solamente 10% di e subisdio, sino a retene 20% debi na e problemanan cu tabata tin cu presupuesto 2014. Algo masha iresponsabel, pasobra mientras tabata tin problema den presupuesto, e cantidad di minister si a aumenta di 7 pa 9 minister, pero pa ensenjansa a keda sin paga 20% di e subsidio. Ta logico cu un organisacion asina grandi ta cai den problema serio na momento cu a keda sin duna nan 20% di nan subsidio. Y si no tabata pa e accion di mayornan siman pasa, ainda SKOA lo ta wardando. Por lo menos awor ta papiando con pa duna SKOA e subisdio cu a keda sin dun’e.

Por a nota cu algun defensor di e minister kier a bruha tera bisando cu MEP tampoco a paga SKOA e subisdio. Ta importante pa hendenan no bruha tera: tempo di MEP, SKOA tabata atrasa cu e jaarrekeningen y regla ta cu e 10% ta wordo paga ora jaarrekeningen ta cla. Ademas, e tempo ey SKOA por a sobrebibi cu e subsidio di e tempo ey, y e tempo ey SKOA no a pensa di aumenta e schoolgeld asina drastico. Pero desde gobierno di AVP na 2009, cosnan a bai di mal en peor. Subsidio a keda baha na 2014, y esey a pone e problemanan escala te cu mester a acudi na mayornan pa pidi mas placa. En bes cu e defensornan ey sali na defensa di e minister, miho nan yuda e minister ehecuta su trabou, y yega na un solucion.

SOLUCION

“Hecho ta cu nos mester pone nos prioridadnan caminda mester pone nan. Aruba merece mihor, nos hobennan merece un mihor ensenjansa. Mester aloca fondonan na ensenjansa en bes di tanto biahamento y fiestamento. Ademas, minister a gaba cu el’a caba di haya 6 miyon euro di Union Europeo, un palabracion hasi di tempo di Nilo Swaen, awel ta bon oportunidad pa inverti e suma aki den nos scolnan basico pa brinda nos hobennan ensejansa acesible pa tur, y di nivel halto. Esey ta nos compromiso cu nos hobennan, inverti den ensenjansa pa hasi ensenjansa acesible pa tur, y brinda nan mas posibilidad den bida”, segun Evelyn Wever-Croes.

Expresionnan haci den e articulo aki no necesariamente ta refleha opinion di ArenaPoliti.co