DEBATE DEN PARLAMENTO DIARANSON 1 APRIL 10 OR AM 

ORANJESTAD -- No ta desde awor fraccion di MEP kier a mira minister Michelle Hooijboer-Winklaar den Parlamento pa duna cuenta, ta basta dia caba. Pasobra no ta un problema so tin den ensenjansa, sino cantidad.Ta parse cu e ministerio di ensenjansa ta na candela. Porfin ta asina leew y e debate lo tuma lugar diaranson mainta 10 or.

"E tema principal ta e aumento drastico di schoolgeld di SKOA, y mirando cu e minister no ta sali di e impasse cu SKOA, Parlamento mester asumi su responsabilidad pa percura cu e muchanan no sali perhudica.
Otro tema ta e problema cu a surgi despues di e suspension di e docente na Scol Primario Kudawecha, cu no a cana segun regla, y den cual tambe ta e muchanan ta wordo perhudica.
Pero tin mas problema den ensenjansa, na entre otro Colegio Arubano cu un biaha mas tin cu acudi na Corte, y tambe tin varios problema riba e tereno di studielening.
Pues den e debate nos kier scucha di e minister kiko ta su alternativanan, su solucionnan pa e tantisimo problemanan serio riba e tereno di ensenjansa, y si e minister no tin alternativanan, e no tin e determinacion pa soluciona e problemanan, e ora Parlamento mester contesta e pregunta si e minister merece di sigi conta cu confiansa di Parlamento, of si e minister mester tene honor na su mes y retira", lider di MEP Evelyn Wever-Croes a duna di conose.

E reunion ta habri pa publico, y por wordo sigi via canal 46, radio 107.5 FM of www.parlamento.aw, y naturalmente tur hende ta bonbini den tribuna publico pa mira y scucha pa nan mes si minister Michelle Hooijboer-Winklaar merese di e confiansa di Parlamento.

Expresionnan haci den e articulo aki no necesariamente ta refleha opinion di ArenaPoliti.co