Diaranson ultimo a tuma lugar e reunion pa trata 2 tema cualnan tawata aumento di schoolgeld di SKOA y schorsing di un docente di basisschool. E reunionan a wordo jama a base di peticion entrega door di fraccion di MEP dia 23 maart y 30 maart 2015.

Durante e reunion fraccion a presenta 2 mocion relaciona cu caso di suspencion di e docente. Basa riba un analisis profundo hasi riba e hechonan cu a conduci na e suspension, nos fraccion a conclui cu e accionan aki y e rol di Minister di Enseñansa Hooijboer-Winklaar den e asunto aki no tawata na su lugar y tampoco segun proceduranan.

Mirando cu e decision menciona no a bai conforme ley y reglanan. Tambe cu e decision ta causando hopi consternacion y intrankilidad cerca studiantenan di e klas y comunidad di Aruba a entrega un mocion pa re-institui e docente bek pa bai duna les na su muchanan, y atende e aspectonan legal y disciplinario manera adulto na un otro forma sin perhudica e muchanan. 

Pa loke ta trata e di dos mocion esaki tawatin di haber cu procedura. Manera menciona caba e suspension no a bai segun regla y leynan. Como sifuera ta poco docentenan a expresa cu no tin un procedura uniforme , estableci y conoci pa tur docente. Den cuadro di esaki Fraccion a entrega e mocion urgiendo Minister di Enseñansa pa presenta un maneho relaciona cu medidanan disciplinario.

Fraccion ta lamenta cu e accionan a conduci na schorsing di un docente contra tur regla y ta spera cu algo asina no sosode nunca mas tampoco.

Expresionnan haci den e articulo aki no necesariamente ta refleha opinion di ArenaPoliti.co