Siman pasa varios mayor a ricibi un carta for di SKOA prescirbiendo con e pago di schoolgeld lo mester tuma lugar den e siguiente lunanan y pa 30 di Juni 2015 e mester ta completamente paga. E motibo segun e carta ta pa garantisa cu cuponan pa e aña escolar 2015/2016. Realidad ta cu e aumento aki ta uno drastico y siguramente e lo bay bira dificil pa mayornan cumpli cu esaki.

Tempo cu mi mes tawata duna les tawatin varios mucha cual nan mayornan no por a cumpli cu e tarifa existente, imaginabo e aumento drastico di 233.33% aki. Den e carta ta poni cu SKOA lo aumenta schoolgeld pa eleva y mehora calidad di enseñansa pa alumnonan. E ponencia aki den nos opinion no ta na su lugar y tampoco ta cuadra cu e realidad pasobra si ta mehoracion bo kier contribui cune no ta na e mayor bo mester acudi sino na gobierno.

Enseñansa ta liber y ta hancra den nos constitucion. Ademas no mester lubida cu leerplicht ta na vigor cual ta nifica cu bo no por yega haci un aumento y spera cu mayornan lo bay cumpli cu esaki. Un gobierno responsabel lo mester por inverti por lo menos 6% di GDP manera cu mundialmente ta wordo stipula. Ademas di esaki ta rekeri pa haci un estudio tambe dirigi riba entre otro maneranan pa haci enseñansa aun mas atractivo pa nos studiantenan cual un “digitale leeromgeving” mes ta un proposicion pa considera cu ta uno moderno, atractivo y lo minimalisa gastonan den futuro.

E problema di SKOA ta su situacion financiero pa diferente motibo entre otro no tawata entrega jaarrekening na tempo y gobierno no tawata subsidia manera debe ser .Cu mester bin ahustacion ta un realidad mirando cu costo di bida a aumenta pero no mester bay cerca mayornan pa esaki sino cerca gobierno!

Expresionnan haci den e articulo aki no necesariamente ta refleha opinion di ArenaPoliti.co