Duna tur mayor cu a paga sin mester, nan placa bek 

ORANJESTAD – Lider di MEP Evelyn Wever-Croes den Conferencia di Prensa di MEP a lansa critica serio riba e falta di accion di parti di Minister Michelle Hooijboer-Winklaar den resolve e asunto di schoolgeld di SKOA.

Dia 1 di april, casi 5 luna pasa, nos a yama e minister den Parlamento pa trata e tema aki, hunto cu e persecucion personal di e minister contra un maestra na Skol di Kudawecha. Nos a urgi e minister pa resolve e problema di SKOA, pasobra ta obvio cu SKOA tin mester di e fondonan y ta logico cu ta Gobierno mester duna SKOA e fondonan. Hasta nos a bis’e cu nos di Parlamento ta dispuesto na yud’e, di move placa di otro post pa pon’e pa ensenjansa, pa asina SKOA haya placa y resolve e impasse cu mayornan.

Pero minister Michelle Hooijboer-Winklaar WRONG AND STRONG, no a mustra ningun interes den soluciona e problema, es mas, mescos cu e problema na Kudawecha, e minister a escala cos. Tur dos caso ta den Corte ainda.

Pa loke ta trata SKOA hues a basa su mes riba un derecho constitucional y legal di muchanan pa ensenjansa liber. Un derecho constitucional cu ta conta pa TUR mucha den scol basico. Pesey mi no por compronde e posicion di gobierno awor cu ta solamente e mayornan cu a gana e caso lo haya nan placa bek. Bo no por limita un derecho constitucional na un grupito so.

Si nos pais tabata tin un gobierno drechi, si e ministernan di Aruba tabata hende homber y hende muher HONESTO, nan mester a respeta derecho constitucional di nos muchanan, y hamas nan lo a laga e cos aki bai asina leew. Awor cu e problema a escala di e forma aki, e minister ta sinta trankil di dje y laga e muchanan bira victima di su maneho desastroso riba tereno di ensenjansa.Pesey nos ta manda e mensahe aki pa e minister: regla e asunto aki cu urgencia y duna mayornan nan placa bek!

TIN PLACA

Si tin placa pa pone cabay blauw tur caminda den Playa, si tin placa pa paga compania di mercadeo pa graba tur loke oposicion ta papia, y si tin placa pa Mike Eman sigi hala faha mara den stoel di business class di KLM, mester por tin placa pa cumpli cu ensenjansa. Unico cos cu mester ta buena fe y compromiso pa traha pa pueblo. Aruba merese mihor, nos muchanan merese mihor, y nos ensenjansa merese di haya prioridad.

Expresionnan haci den e articulo aki no necesariamente ta refleha opinion di ArenaPoliti.co