Diahuebs ultimo a trata den Parlamento e asina yama ‘Koersmargevergoeding’. Ta trata aki di un prima cu Banco Central por cobra e banconan local riba nan ganashi cu e compra y benta di divisa cu unanimamente a keda legalisa, segun informe di Minister di Finanzas, Angel Bermudez.

E prima aki ta uno minimo, pues di 0,125% pa 0,325% cu lo aporta na cubri e gastonan di Banco Central pa cu su tarea den maneho di reservanan di divisa di pais Aruba.

Manera ta conoci, Banco Central ta un instituto independiente cu tin cu genera su propio entradanan for di su tareanan, cu ta encera entre otro, supervision di nos institutonan financiero, siguransa di e balor di nos florin y rendimento di su capital.

Segun e mandatario di Finanzas e ley aki lo yuda debidamente ya cu e instituto independiente aki tambe ta enfrenta su bareranan debi na e situacion financiero mundial. “E entradanan a mengua drasticamente pa motibo di e crisis economico-financiero mundial, pues e gastonan di Banco Central ta aumentando y ta pa e motibo aki mes Banco Central a dicidi pa introduci e prima aki pa cu e transaccionnan den divisa di banconan local”, Minister Bermudez a indica.

E mandatario ta aclaria si cu e ley aki no ta un medida di Gobierno. “Mi kier reitera cu e prima aki no tin nada di haber cu situacion financiero di Aruba, e prima aki no ta un impuesto y no ta toca balor di nos florin tampoco!”, minister di finanzas a expresa.

E ley aki, di Koersmargevergoeding, ta simplemente un fuente di entrada di Banco Central y Parlamento di Aruba como legislado a aproba e concepto di ley aki unanimamente.

Expresionnan haci den e articulo aki no necesariamente ta refleha opinion di ArenaPoliti.co