Mi ta realisa cu publicando mi opinion di loke ta tumando lugar actualmente den parlamento di Aruba, lo por ta motibo pa atekanan personal atrobe contra mi persona, pero mi ta considera mi deber como politico, y principalmente como un Arubiano orguyoso, di expresa mi disgusto riba e forma cu e miembronan di parlamento ta kere cu nan por atacha ainda mas e credibilidad di e organo mas halto di nos constitucion.

Ami tawata tin e honor di a representa nos digno pueblo den diferente funcion.
Entre nan mi tawata minister plenipotenciario na Hulanda, minister den gabinete Nelson Oduber, pero tambe presidente di parlamento di Aruba, y como ultimo tambe miembro di parlamento.
Mi ta conoci como un persona cu no ta ria pa expresa su opinion den un forma bastante expresivo, pero semper cu un solo meta: salbaguardia e legado cu señor Gilberto Francois (Betico) Croes d.f.m. a laga atras.
Betico Croes a instrui nos pa defende cu alma y cuerpo, y salbaguardia e derecho di autodeterminacion di nos pueblo, e derecho di felicidad di nos pueblo, y e derecho di cada un cu ta biba riba e pida Baranca aki, di por hiba un bida segun tur regla di humanidad.

Kiko nos a bin ta experiencia e ultimo añanan: polarisacion, discordia, falta di respet pa nos organonan consultativo manera Raad van Advies, Algemene Rekenkamer Aruba.
E no a caba aki, pasobra a cuminsa hasta trata di atacha e reputacion di nos Gobernador, y culminando den un muestra bergonsoso di un falta di respet por completo pa nos parlamento.
E consecuencia di tur esaki ta cu na Aruba enbes di democracia, dictadura gubernamental a haci su entrada na unda e parlamento a wordo dividi di un banda den e grupo cu ta apoya e gobierno y cu ta manifesta nan mes como “cheerleaders”, mientras di otro banda nos por ripara cu e partidonan den oposicion, pa motibo di un desespero total, ta cuminsa demostra un falta di madurez politico tambe.

Pueblo di Aruba ta contribui pa paga e salario di tur 21 representante den parlamento, y manera tur otro persona responsabel den nos comunidad, pueblo mester por spera cu e representantenan lo cumpli cu nan tarea debidamente, y esey ta CONTROLA gobierno, pero tambe e “cheerleaders” di e fraccion mayoritario den parlamento.
Pa cumpli cu e tarea aki e partidonan den oposicion mester eherce un regimen estricto pa e.o. tin representacion den e reunionnan di parlamento y tambe den e reunionnan di e Centrale Commissie.
No tin den mi concepto ningun excusa pa no a cumpli cu e tarea aki.

E acto baho y anti-constitucional di e partido na mando di no a cumpli atrobe cu palabracionnan haci den parlamento, ta inaceptabel, pero nunca por ta motibo pa tuma esaki como ehempel pa no cumpli cu e tarea cu pueblo ta exigi di cada un representante den parlamento.

Den nomber di Union Patriotico Progresista – U.P.P.
Candelario A. S. D. – Booshi – Wever
Brazil, november 20, 2014

Expresionnan haci den e articulo aki no necesariamente ta refleha opinion di ArenaPoliti.co