Kiko a ponebo trek in bo retiro? 

STA CRUZ – Lider di Fraccion di MEP sra. Evelyn Wever-Croes tin ya 5 dia ta pidiendo minister Otmar Oduber pa duna Parlamento copia di su carta di retiro. E motibo ta cu ta Parlamento ta dicidi riba retiro di un minister, no gobernador.

Ademas, segun e lider di MEP, nos mester por compronde e expresionnan hasi pa minister Otmar Oduber dia 6 di januari ora el’a sali di su reunion cu Gobernador. Pasobra literalmente Oduber a bisa: “Mi decision ta tuma, e ta por escrito y e ta entrega na gobernador. Tin un crisis den sentido di diferencia di opinion hopi grandi entre ami y e gabinete, .. Carnaval ta simplemente e tip riba ijsberg. Pero ora no ta haya oido mas paden, bo mester busca atencion mas halto”, refiriendo na su bishita na Gobernador. Oduber a critica especialmente e maneho di husticia y seguridad den comunidad, pero tambe finansas publico pa e decisionnan cu mester wordo tuma y ateni na dje pa e acuerdo cu Hulanda. “Esakinan ta un par di e puntonan cu no ta haya atencion debido, bo tin cu recuri na gobernador, cu si pa prome di maart no mira un cambio pa loke ta trata e maneho riba e dos terenonan especifico, mi lo tuma mi retiro”.

E minister a bolbe reitera cu e no ta haya sosten den su gobierno pa cu tursimo, especialmente el’a bisa literalmente “E sosten cu mester haya di ensenjansa, finansas y husticia no tey… Ta momento di bisa cu otro proyectonan por wanta un rato y ban pone atencion na loke ta e prioridadnan”, cu segun Oduber ta criminalidad, ensenjansa, finansas y liderasgo di su gobierno.

Lider di MEP a splica na mas di un ocasion cu ta importante pa Parlamento tuma nota di e carta di retiro, of e Nota di 9 punto di retiro, manera e conseheronan di e minister mes ta yam’e. “Pasobra minister Oduber ta un insider cu ta cuestiona e mesun puntonan cu nos ta cuestiona. Awor e minister a informa nos cu tur cos ta regla, cu nan a papia y tur cos ta soluciona. Sinembargo den e presupuesto nos no ta mira cu nada a cambia. Pesey nos mester sa cual ta e solucionnan cu e minister a yega na palabracion cu su coleganan Dowers, Hooijboer, Bermudez y Eman, y unda den e presupuesto nos por haya e solucionnan” Evelyn Wever-Croes a puntra.

Minister Otmar Oduber tin 5 dia ta bula pipa den Parlamento, y no kier reacciona. Cada biaha e ta cuminsa insulta, djis pa no mester contesta e pregunta di lider di oposicion. Esaki ta pone nos yega na e conclusion cu nan no a regla nada ainda, y awor simplemente ta pone un show den Parlamento. “Minister Otmar Oduber ta hopi scuma y poco chuculati anto. El’a djis ganja muri pa mira ken ta bin su entiero?” lider di MEP a puntra.

Expresionnan haci den e articulo aki no necesariamente ta refleha opinion di ArenaPoliti.co