Oranjestad – Durante e debate riba presupuesto 2016 den Parlamento di Aruba gobierno di Aruba a presenta un perspectiva optimista pa loke ta futuro di Aruba. Tanto economia como finanzas di pais Aruba ta duna muestra di un imagen positivo a termino medio-largo.

E situacion di finanzas publico di pais Aruba a mehora considerablemente den dos aña di tempo. Gobierno ta sali di e punto di bista cu tin un deficit di 2.0% BBP, esaki mirando e confiansa cu gobierno tin den aumento di entrada den caha di gobierno. Minister di Finanzas Angel Bermudez: "Sigur pa loke ta entrada di 2016 gobierno tin tur confiansa cu esaki lo ta conforme e presupuesto. Si tira un bista riba e desaroyo di entrada di belasting di e ultimo añanan por conclui cu e entrada semper tabata conforme e presupuesto of hasta miho.”  



Bermudez: “Aunke cu e realisacion di 2015 no a wordo verifica completamente ainda, ya caba mi por bisa cu nos tin mas entrada di belasting na 2015 cu nos a presupuesta. Esaki tabata e caso tambe na 2014. Ademas mi kier subraya cu e desaroyonan pa loke ta e refineria ainda no a wordo registra den e presupuesto aki. Tanto un reapertura como un desmantelacion di e refineria ta nifica extra entradanan considerabel pa pais Aruba.”

Loke ta gastonan di pais Aruba a traha duro pa baha nan. Prome Minister Mike Eman ta tira un bista den pasado relaciona cu esaki. “Den e ultimo 6 añanan nos a introduci un programa extenso di baha gasto. Nos a reforma e pensioennan y a salba AOV, contribucion di gobierno na AZV a baha considerablemente y riba dje a baha e personal cu mas di 5%. Esaki ta e trend cu nos ta bay sigui. Mientrastanto tin un acuerdo beneficioso di VUT cu e ambtenaarnan por haci uzo di dje. Bermudez:  "Gobierno ta enfoca riba e proceso natural y ta stimula empleadonan pa sali boluntariamente di servicio. E resultadonan di accion asina riba termino largo no ta visibel di biaha, pero nos ta sigui intensiva nos esfuerzonan. Nos ta percura pa no causa olanan grandi den nos economia door di accionnan rigoroso. ”

Gobierno tin tur confiansa pa loke ta futuro di Aruba. Eman:“Si nos mira e espectativanan di e aña aki y e aña cu ta bin, Gabinete no por otro cu ta positivo. Tanto pa loke ta crecemento economico como maneho financiero nos tin tur cos bon bou control.

Hasta sin reapertura di e refineria e crecemento economico ta bay ta riba 3% y e deficit presupuestario ta bay ta bou di 1%.  Cu reapertura di e refineria e crecemento ta bay  ta mas cu 6% y un surplus considerabel riba e presupuesto. Tur esaki sin a haya prestamo na un interes suave via Hulanda. Pa loke ta e ultimo aki nos lo bolbe bay den deliberacion cu gobierno Hulandes.”

Expresionnan haci den e articulo aki no necesariamente ta refleha opinion di ArenaPoliti.co