Riba e dia cu nos ta recorda e esfuerzonan pa combati cancer, siman pasa, fraccion di Democracia Real a presenta un mocion cu a wordo aproba unanimamente den Parlamento.
Durante conferencia di prensa di Partido Democracia Real Andin Bikker a trece esaki dilanti.
E mocion aki ta pa nombra un comision, manera ta e caso pa reapertura di e refineria, pero esaki ta pa nan explora e posibilidadnan pa e pacientnan terminal di cancer haya acceso na remedinan prometedor pero cu ta den fase experimental.
Bikker a splica cu poco siman pasa Presidente di Merca Obama a haci un anuncio cu nan ta bay intensifica esfuerzonan pa busca un curacion pa cancer den nos life style anto a corto plazo.
Andin Bikker a splica cu na mundo hopi hende ta muriendo di cancer y aki na Aruba segun sondeo di un medio di comunicacion, 50 porciento di e poblacion ta muri di e malesa aki.
Mientras, na Merca, Hulanda, Alemania ya otro paisnan Europeo ta trahando pa duna acceso na pacientnan cu ta wordo duna por ehemplo un aña mas di bida y den e direccion aki e ta desea pa Aruba bay tambe.
El a pone como ehemplo Florida cu ta un ciudad di Merca hopi bishita pa nos Arubianonan, practicamente tur siman, ta un di e 50 estadonan di Merca cu a aproba e acceso na e remedinan den desaroyo aki pa pacientnan den fase terminal di cancer.
Bikker a splica cu aña pasa durante PDR su biahe na Hulanda pa participa den IPKO el a bishita un agencia di remedinan asina aki, “My tomorrow.com” y na mei proximo cu lo bay atrobe aya pa e reunionnan interparlamentario, e lo bishita un clinica cu ta duna e acceso aki na pacientnan di cancer terminal. E ta sinti cu ta un simbolo y un sosten di nos Creador cu precisamente dia 4 di Februari, cu ta dia pa recorda e esfuerzonan cu ta wordo haci pa combati cancer y recorda esnan cu a laga nos pa motibo di e malesa aki, e mocion di PDR a keda adopta pa parlamento unanimamente.

Expresionnan haci den e articulo aki no necesariamente ta refleha opinion di ArenaPoliti.co