Siman pasa pueblo por tawata testigo di un discussion cu tawata tin durante rueda di prensa di minister Otmar Oduber. Den e reuda di prensa aki miembro di prensa Speed Anrade a cuestionan e minister riba su maneho y muy en especial e hecho con e intimo amigo di minister ta haya tur contract di ATA pa haci mercadeo y tambe e mesun intimo amigo tin e logo di pais Aruba. Pueblo por a presencia un Otmar Oduber arrogante, rabia y vengativo. E la perde control y no por a domina su emocionan y esakinan a bai hopi halto durante e rueda di prensa. Loke si nos no por a kere ta e hecho cu Otmar Oduber despues di e rueda di prensa a yama donjo di Diario y manda un carta tambe pa e donjo caminda e ta pidi e donjo di Diario pa tuma accion contra e reportero Speed Andrade. E carta ta papia pa su mes y ta Otmar Oduber mes a firma e carta aki y ta poni textualmente: ‘’ mi ta spera cu pasonan wordo tuma’’.

Consequentemente e medio di prensa a retira e retiro Speed Andrade for di trabou. Retiro di un periodista (sin importa ken e por ta) meramente pa metanan commercial entre e medio di prensa y un Gobierno ta e attentado mas serio ever cu por a wordo hasi contra Democracia!!! Prensa ta e di Cuatro Poder/Vierde macht y nan tin e OBLIGACION pa saca e berdad vooral for di un institucion manera Gobierno of cualkier Minister!!! Atrobe no ta importa mi ken e persona por ta, pero loke no por accepta sin mas ta BLACKMAILING di un Gobernante pa hanja su gusto.

Otmar Oduber durante e rueda di prensa aki cada vez tawata papia di transparencia y remarcabel ta cu net Otmar Oduber nunca kier a duna parlamento informacion na momento cu nos hacie preguntanan riba logo di Aruba, royalties, mercadeo y dunamento di contract. Na momento cu bo ta haci maluso di bo poder y funccion di minister pa persigui hende, persigui prensa, manda kita prensa for di trabou bo ta un amenaza serio pa no solamente democracia sino un amenaza serio pa libertad di prensa y libertdad di expresion. Den pasado tawata siman aden y siman afor cu e gobierno anterior tawata wordo confronta cu ruedanan di prensa caminda nan tawata wordo cuestiona y critica pa prensa severamente. Ningun dia a pensa pa manda un carta pa ningun medio di prensa pa retira un reportero pasobra e lo a falta respet. Tur dia tawata falta respet di gobernantenan di e gobierno anterior.

E kier papia di persecusion politico y mira kiko e mes ta bira haci cu Speed Andrade despues cu Speed a cuestione y a haci 6 pregunta den 1 conferencia di prensa cu e minister mes a yama. Otmar Oduber ta kere cu e por silencia tur hende haciendo mal uso di su funcion y su poder. Di unda a sali cu ningun hende, ni prensa, ni opisicion mag di cuestiona maneho di un minister of haci preguntanan pa haya sa e berdad! Un Avpista raha a cuestiona Otmar Oduber y a hacie 6 pregunta y awe e ta perde su trabou pa papia e berdad! Ki senjal Otmar Oduber ta manda pa libertad di expresion? Unda Mike Eman mes ta?? E ta aproba loke Otmar Oduber a haci y ta haciendo cu ATA? E ta aproba persecusion asina?  Den tur esaki Mike Eman mes ta spoorloos, sin vision, sin liderazgo y sin opinion.

Den cuadro di transparencia ta deber y obligacion pa Otmar Oduber splica pueblo pakiko ta net compania di su ‘’ruman’’ a gana e logo di Aruba. Splica pueblo pakiko ta net e compania di su ‘’ruman’’ manera nan ta yama otro ta print tur e bannersnan ora tin fiesta nacional. Splica pueblo cuanto su ‘’ruman’’ ta paga ATA na royalties pasobra te awe ningun hende sa cuanto e compania cu tin e logo di nos pais ta paga ATA na royalties. Kiko tin di sconde pa pueblo! Otmar Oduber a lastra gobierno di MEP pa friends and family y awor cu e tin e poder y no ta yuda solamente amigo y famia sino e ta yuda su mes tambe! Mientras nan ta fiesta e pueblo mes ta sufri.

Expresionnan haci den e articulo aki no necesariamente ta refleha opinion di ArenaPoliti.co