Vice secretario di NU Acharya y Prome Minister Eman a pone enfasis riba nan situacion

ORANJESTAD - Conferencia P3a (Public Private Partnership Aruba, PPP), cu a tuma luga siman pasa na Aruba tabata masha exitoso. Un conferencia cu tabata un esfuerso conhunto di Nacionnan Uni, Hulanda y Aruba. Durante tres dia largo oradornan di renombre a trata temanan interesante cu ta di importancia grandi pa islanan chikito cu ta confronta retonan mayor pa loke ta cambio di clima y su consecuencianan devastador. E tema PPP, cu ta di gran interes pa e islanan SIDS a core manera un liña cora den henter e conferencia. Representantenan di e nacionnan isleño a keda satisfecho cu loke nan a presencia y tambe participa. Vice Secretario General di Nacionnan Uni sr. Acharya y Prome Minister Mike Eman a pone masha hopi enfasis riba e retonan cu e islanan (SIDS- Small Island Developing States) ta enfrenta y con Nacionnan Uni y Aruba, cu tambe ta parti di SIDS, por aporta.

Sr. Gyan Acharya: "E nacionnan isleño por conta mundo con anda cu cambio di clima, nan aporte den esaki ta significante, pasobra cu apesar cu nan 'carbon footprint' ta minisculo, nan ta e promenan cu ta sufri e consecuencianan di cambio di clima." Acharya ta haya cu mundo mester bira mas consciente y traha hunto pa yuda e islanan cu ta coriendo peliger, pasobra si esaki no tuma luga, anto partinan grandi di e islanan ta bay bou awa y perdi pa semper. "E islanan mester sirbi como ehempel pa comunidad internacional." Acharya a bisa cu el a keda masha encanta cu Aruba, cu e bunita proyectonan sostenibel y di PPP y sin duda cu e bunita beachnan pa cual Aruba ta famoso." Mi lo mester bin bek pa disfruta di nan."

Prome Minister Mike Eman a splica cu lo ta hopi bon pa e nacionnan isleño (SIDS) si Hulanda gana e asiento den e Conseho di Siguridad di Nacionnan Uni. "Door cu Hulanda mes tin SIDS, e pais ta compronde e retonan di e nacionnan aki. Si Hulanda ta den un posicion mas fuerte ainda den e organisacion di Nacionnan Uni,  nos voz tambe por resona den e Conseho di Siguridad aki. Ora mi a haya e honor pa trece un mensahe di SIDS den Conseho si Siguridad di Nacionnan Uni pa loke ta trata e tema siguridad, esaki a haya tremendo reaccion." Eman a bisa di ta contento cu durante e bilateralnan cu el a tene cu representantenan di SIDS, nan tur tabata positivo pa loke ta e asiento pa Hulanda, pero ta keda na nan gobiernonan pa dicidi.

Expresionnan haci den e articulo aki no necesariamente ta refleha opinion di ArenaPoliti.co