ORANJESTAD – Lider di MEP Evelyn Wever-Croes den conferencia di prensa a reacciona riba un veredicto di Corte di januari, cu apenas siman pasa a wordo publica den corant Amigoe. Ta trata di un compania cu a haya un cobransa di belasting di 11 miyon florin, pero cu segun Corte a caduca.

“Mi ta puntra mi mes ta ki maneho minister Mike Eman y minister Bermudez ta aplicando. Pasobra e pensionado si ta wordo persigi pa 11 florin mes, pero un compania cu debe 11 MIYON florin ta wordo neglisha? E machi cu e pachi di campo si mester paga delaster un cen. E cuidadano humilde ta perde su cas, of nan ta bende su auto of nan ta pone beslag riba su salario pa debenan hopi chikito, hasta debenan cu a caduca caba. Pero un compania no?
Nos ta bai yama minister Bermudez den Parlamento pa bin duna cuenta. Ami tin algun anja caba ta pone atencion riba e tema di cobransanan di belasting cu a caduca. Tur siman na nos Cede mi ta yuda cuidadanonan cu ta haya cobransanan cu a caduca caba, y mi ta traha carta pa nan. Minister Bermudez a hasta considera esey inmoral, pasobra segun e minister moral ta pa paga un debe cu a caduca caba.Ami no ta bai den e discusion ey, pasobra moralidad ta locual mas falta den henter gabinete Mike Eman.
Pero loke nos no tabata sa ta cu companianan cu debenan miyonario no ta wordo persigi, pero mama y tata di famia humilde si. E minister debe nos pueblo un splicacion.
Mi ta lamenta cu e minister mes no tabata transparente y bin duna cuanta riba propio iniciativa, pero a scohe pa sinta keto y no papia di e tema. Esaki ta e problema general cu e gobierno aki, intransparencia total”, segun lider di MEP.

HOPI DEBE A CADUCA
Lider di MEP Evelyn Wever-Croes ta bolbe accentua cu na momento cu bo haya dwangschrift, semper wak bon si e debe a caduca caba of no. Pa bo no bai paga algo cu legalmente bo no mester paga. Si bo tin pregunta of duda, acudi na Cede di MEP tur dialuna mainta 9or pa bo haya conseho riba e tereno aki serca Evelyn Wever-Croes. Manera e lema di Servicio di Impuesto ta bisa, paga belasting ta deber di nos tur, pero no paga dimas belasting.

Expresionnan haci den e articulo aki no necesariamente ta refleha opinion di ArenaPoliti.co