Tur hende na Aruba, a pesar cu nan por tin nan preferencia politico, sa cu Aruba mientrastanto ta bancarota, tin un insiguridad halto y hopi persona ta sinti cu Aruba no ta di nan mas. Sin excepcion, tur hende ta duna e clase politico e culpa pa esakinan. Pero remarcabel, ainda hopi hende ta prefera di sigui duna e mesun politiconan cu a causa e deteriora social economico aki, nan sosten pa continua. Varios biaha bo ta tende hende bisa cu nos isla ta den un ‘winterslaap’ politico. Tambe bo ta scucha cu pueblo a bira masochista, pasobra nan ta gusta wordo castiga pa e clase politico tradicional.

E ultimo observacion aki ta interesante, pasobra e tin un alusion na e ‘Stockholm Syndrome’. E sindroma aki, ta e fenomeno psicologico unda e victima ta desaroya empatia y sentimento pa su abusado. Tin biaha esaki por yega hasta caminda e victima ta identifica su mes cu y defende su abusado. E victima na dado momento no por mira mas, of acepta, cu ta su abusado ta esun cu a pone den su situacion penibel y cu e ta caus’e daño. Un particular y condenabel ehempel di e sindroma ‘Stockholm’, ta esun di ‘Loverboy’. Aki ta caminda un homber ta seduci un mucha muhe, hopi biaha menor di edad, y lag’e kere cu e ta stim’e. Pero e ‘Loverboy’ su unico meta ta pa probecha di e mucha y nada mas.

Ora e fenomenonan di dominio aki wordo uza na nivel di individuo, tur hende ta conden’e. Pero momento cu e mesun fenomeno wordo aplica na nivel di sociedad, hopi hende no kier ni mir’e of acepta cu e ta pasa. Pa hopi persona e ta casi imposibel pa kere cu esaki por pasa, pasobra den un estado di derecho tin mecanismo pa preveni y coregi abuso. Esaki ta bibando den un realidad politico falso.

Nos democracia a wordo reduci na cuanto show por wordo organisa rond di un proyecto, kende por ‘cumpra’ mas voto y cua politico por haci mas hende dependiente di dje. Preguntanan manera, ‘Con a para cu e balor personal, e interes general, sirbimento di pueblo of respet?’, parce no ta wordo haci mas. Momento cu un politico haci un ciudadano dependiente di dje, e ta kita e balor propio, e orguyo y e dignidad di e ciudadano. Cu otro palabra, e politico a haci e ciudadano su esclavo of un pedido di limosna. Kisas algun hende no kier reconoce of admiti esaki, pero haci bo mes e siguiente preguntanan si bo tin duda: Dicon un ciudadano tin cu dirigi su mes personal na e minister pa cualkier cos? Dicon sin e ‘krabbeltje Akkoord’ di e minister riba e peticion di un ciudadano, su peticion no ta haya prioridad? Dicon a bira moda awendia cu un ciudadano tambe tin cu registra na un ‘bureau of un cas di partido’ prome cu su peticion wordo tuma den ‘behandeling’? Dicon despues di e ‘ayudo’ di e minister, un ciudadano mester keda eternamente agradecido na e minister (of partido) pa e ‘fabor’?

Tur hende sa cu nos democracia a wordo reduci na esaki, pero ainda un parti grandi no kier admiti esaki. Esaki no ta democracia y tampoco esaki ta sirbi e interes general. Regularmente nos ta scucha hende bisa, ‘Pero kico por wordo cambia?’, ‘Semper tur cos lo keda mescos’ y ‘Tur politico ta ladron y e hortamento lo sigui toch’. Pensamentonan asina no solamente ta refleha un actitud sumiso, pero tambe conformismo, miedo y berguensa!

Ta p’esey e clase politico tradicional por sigui destrui e pais aki na nan antoho. Pasobra cada dia mas hende ta perdiendo confiansa, ta birando dependiente di un fabor politico, ta birando cobarde of simplemente ta birando indiferente. Of kisas cada dia mas hende ta ripara cu nan tambe a scoge desde Status Aparte (of kisas prome) pa tolera e abuso politico. Algun hasta ta prefera sigui kere den e ideologianan di pasado di estadistanan grandi enbes di haci nan mes e pregunta, ‘Con a para cu e idealnan di e estadistanan grandi’ y ‘Dicon e politiconan actual tin cu uza plumanan di esunnan di pasado pa aparenta como un politico grandi?’. Nos pueblo ta bibando den un realidad politico falso, pa no mira y acepta e berdad amargo. Cada dia cu esaki sigui, lo nifica mas esfuerso y sacrificio di pueblo mes den futuro. Of den e caso extremo, cu otro hendenan di afo, tin cu bin haci locual nos mes a laga di haci. Pues un otro of mas dependencia, pero cu un ‘enemigo comun’. Asina pueblo por sigui sinti cu e ta e culpa di un otro atrobe, pa no acepta cu ta pueblo mes a tolera pa e clase politico tradicional destrui e pais.

Locual a wordo discuti breve den articulo aki ta e fenomenonan di ‘Denying (Nenga) and Distancing (Distancia)’. Nos estadistanan grandi, Sr. Juancho Irausquin y Sr. Betico Croes, a laga e pueblo mira cu ta pueblo tin e poder y no e politico. Nan tambe a laga pueblo mira cu si realmente un politico ta integro, cosnan grandi por wordo realisa y asina pueblo por haya su orguyo y dignidad bek. Pero lamentablemente ta cosnan mediocre y bergonsoso so a wordo realisa e ultimo añanan.


(www.aboaruba.org , info@aboaruba,org )

Expresionnan haci den e articulo aki no necesariamente ta refleha opinion di ArenaPoliti.co