Esaki ta demostra e teamwork den gobernacion 
A anuncia renobacion completo di biblioteca na San Nicolas 

Dialuna mainta ta habri cu noticia sumamente positivo unda Gobierno di Aruba oficialmente ta anuncia renobacion completo di biblioteca na San Nicolas. Minister Michelle Hooyboer-Winklaar, Minister Otmar Oduber conhuntamente cu Minister Mike de Meza y tambe miembronan di Parlamento tabata presente na un momento asina special pa San Nicolas cu ta conociendo cambionan drastico ultimamente.

Den henter e desaroyo di San Nicolas ta sobresali e necesidad grandi di biblioteca na San Nicolas cu tambe mester di su debido atencion. Minister Oduber ta indica cu un biaha mas esaki ta demostra e teamwork den gobernacion unda cu ta pone cabes hunto contribuyendo a traves di turismo na e diferente aspecto importante den nos comunidad.

A traves di fondonan adicional ricibi danki na e tremendo resultadonan di turismo na 2015 y entradanan adicional di 4 miyon Florin di aeropuerto, cu por a pone fondonan disponibel pa renobacion completo di nos Biblioteca na San Nicolas y hacie digno di e cambionan cu ta tumando luga na San Nicolas.

E mandatario ta comenta: “Despues cu hunto cu ATA nos a pone mey miyon Florin na EPI sector turismo pa compra y mehoracion di nan instalacionnan, mi colega Michelle Hooyboer-Winklaar a bisami cu el lo bolbe bati na nos porta y awe nos a cumpli! Mi ta hopi orguyoso di por contribui cu sosten di mi coleganan pa duna e mucha y hobennan un instalacion digno di nan.”

Unanimamente tur e Ministernan di Gabinete Mike Eman II a tuma e decision durante Conseho di Minsiter, cu e fondonan adicional mester bay aloca pa e biblioteca na San Nicolas. No solamente pa drecha e fachada di e edificio pero pa paden tambe haciele apto pa tanto e muchanan y hobennan cu mester un espacio pa nan por haci nan les of sigui desaroya cu tur e materialnan disponibel.

Minister Oduber ta mustra e hecho cu pa sigur e ultimo añanan aki a papia hopi riba henter e desaroyo pa San Nicolas y awe por mira tur e proyectonan tumando luga. Tin varios proyectonan andando simultaneamente den e area specifico aki di San Nicolas manera ta e embeyecemento di e caya principal cu a inicia den e area popularmente conoci como Promenade cu su prome fase ta conclui dilanti e monumento Nicolaas Store cu porcierto ta e mesun trio di Minister Michelle Hooyboer-Winklaar, Minister Otmar Oduber conhuntamente cu Minister Mike de Meza a firma pa e compra di e monumento aki y cu awor tambe ta conociendo un renobacion completo y cu dentro di poco lo ta ubicando Community Museum den esaki. Aruba Mural Projects cu den siman tras di lomba a conoce mas arte riba muraya. Y no por keda sin menciona e icono di San Nicolas cu ta e Watertoren unda e Museo Industrial lo keda ubica. Un inversion di alrededor di 15 miyon florin cu e vision pa logra haci di San Nicolas e Cultural and Heritage City di nos isla.

Den anja 2008 pa 2009  bibloteca na San Nicolas a ricibi un renobacion di cual e calidad di verf no a resulta di ta e miho. Awor ta sigur cu lo percura pa miho material pa e renobacion di e bibloteca na San Nicolas keda optimal y digno complementando tur e cambionan cu ta tumando luga den henter e area cu lo ta e prome fase pa logra haci di San Nicolas e Cultural and Heritage City di nos isla.

Expresionnan haci den e articulo aki no necesariamente ta refleha opinion di ArenaPoliti.co