EVELYN WEVER-CROES DECEPCIONA DEN E REACCION DI AVP 

STA. CRUZ --  Lider di MEP Evelyn Wever-Croes a duna di conose cu locual a pasa den Parlamento ta algo bergonsoso. Es mas, e berguensa ta mas grandi cu nunca. E hecho cu e presidente di parlamento y e vice-presidente di parlamento a dicidi di dal otro, ta condenabel y personan envolvi mester carga nan responsabilidad.

“Pesey nos a pidi pa un investigacion imparcial wordo hasi, y pa presenta Parlamento cu e resultadonan di e investigacion pa Parlamento tuma un decision. Pasobra na prome lugar pueblo merese di sa e berdad. Chris Dammers a dal Marisol Lopez un mokete? Marisol Lopez a dal Chris Dammers dos wanta? E acto aki no por keda sin consequencia y no por ta asina cu otro siman esunnan cu a dal otro ta bai sinta bek riba  nan stoel bek, y hasi manera nada no a pasa. Nos mester tuma accion, pa diferente motibo. Pa di prome pasobra nos mester duna ehempel den Parlamento. Cualquier trahado cu lanta man pa otro ta perde su trabou imediatamente, y pues Parlamento mester duna e ehempel cu cada ken mester carga nan responsabilidad tambe.

Pa di dos pakiko mester tuma accion ta pasobra bo no por laga e presidencia di parlamento den man di hendenan cu no por atende cu e stress di trabou, pasobra si nan no ta “stressbestendig” nan no ta apto pa e trabou. Pa bo ta presidente of vice-presidente di parlamento bo mester por deal cu stress, y no lanta man mesora pa dal hende!

Y naturalmente nos mester atende cu e actonan aki pasobra esaki ta e resultado, e muestra di e decadencia cu tin den nos pais bou gabinete Mike Eman, e forma con Mike Eman a goberna e pais aki cu ta acepta kiko cu ta y con cu ta basta e keda na poder. E degeneracion aki a corumpi y a frustia henter e presidencia di parlamento djis pa nan keda na poder.

AVP TA UN PARTIDO ABUSADOR DI HENDE MUHER

Locual a pasa den Parlamento ta un berguensa y mester wordo condena pa tur hende. Pesey mi ta lamenta e posicion di fraccion di AVP di ni carni ni pisca. Cu e hende hombernan den fraccion di AVP ta asumi e actitud di cobarde ainda talves mi por purba compronde. Pero cu e hende muhernan di partido AVP no ta sali condena abuso contra hende muher si mi no por compronde. Pasobra semper nan ta asisti na conferencianan contra abuso di hende muher, pero awor cu nan mester mustra cu REALMENTE nan ta contra abuso di hende muher, nan ta permiti pa Mike Eman presiona nan, pa Mike Eman silencia nan pa nan keda na poder y nan no ta condena e abuso di hende muher. Aki tur e parlamentarionan di AVP, pero especialmente e hende muhernan di AVP, a demostra cu pa nan poder y placa ta mas importante cu sali na defensa di derechonan di hende muher. Y ta muestra con hende muhernan ta wordo abusa den partido AVP. Locual a pasa, y especialmente e reaccionnan despues ta mustrabo ki tipo di partido AVP ta: Partido AVP ta un partido abusador di hende muher!” ta palabranan di lider di MEP Evelyn Wever-Croes.

Expresionnan haci den e articulo aki no necesariamente ta refleha opinion di ArenaPoliti.co