E pregunta cu te dia di awe, un siman despues di e acto bergonzoso den parlamento ta, ki consequencia e acto aki pa parlamentarionan envolvi? Den casonan normal na momento cu un trahadornan ta agredi otro fysicamente na pia di trabou, e conseuquencianan ta, sea e traharo(nan) ta wordo geschors of ta wordo retira op staande voet. Siman pasa den parlamento a tuma lugar un acto sumanete bergonzoso y envez cu tin consequencia pa e comportacion y acto aki ta parce mas bien cu AVP kier tur hende lubida e susceso y kier pa nan get away cu solamente un disculpa. Pueblo ta exigi di AVP pa tuma accion y NO lo accepta un disculpa. Ta casi hilarico pa tende con minister De Meza kier pidi disculpa na pueblo pa algo cu parlamentarionan di AVP a haci. Unda e parlamentarionan di AVP mes a keda? Nos por a scucha varios declaracion di miembronan di AVP, uno mas bruha cu otro, pero hecho ta cu tur a confirma cu golpi a cai den sala di parlamento. Loke si nos ta lamenta profundamente ta cu fraccion di AVP, ni Mike Eman ni ningun minister di gabinete Mike Eman 2 a condena e hecho cu Sr Dammers a pone man riba un hende muher. Ningun di nan a bisa cu loke Sr Dammers a haci ta robez sino mas bien tur kier laba man y tira culpa riba tur 2. Cu e actitud aki partido AVP ta aproba violencia contra hende muher y esaki ta algo di lamenta. Den ningun situacion, un hende homber mester mishi cu un dama. E no mester ni dal e, ni pusha y ni mishi cune. Den e caso lamentable cu a sosode den parlamento tur testigo a confirma cu tawata tin dalemto.

Parlamento di Aruba ta e organo di mas halto di nos pais y nos mester fungi como ehempel pa communidad. Na momento cu algo asina bergonzoso ta sosode den sala di Parlamento y NO tin consequencia pa e comprotacion aki, nos ta manda e senjal robez pa communidad. Hamas y nunca por ta business as usual den Parlamento. Mescos ta e caso ora cualkier otro trahador ta agredi otro na pia trabou tin consequencia pe, mescos mester ta conta pa parlamentarionan.

Den e caso aki pueblo ta exigi claridad y mester wordo informa kiko ta e pasonan cu lo wordo tuma contra esnan envolvi. Keda keto no ta un opcion. Pidi disculpa na pueblo no ta acceptable. Partido AVP kier trek recht wat krom is y kier haci manera loke a sosode no ta nada grave sino mas bien un simple incidente. E NO ta un simple incidente pasobra aki ta trata di un pelea cu aggression fysico entre presidente di parlamento y vice president di parlamento. En todo caso, si AVP kier hinca e caso aki den ‘’doofpot’’ fraccion di MEP sigur NO lo haci esaki. Nos ta exigi clarificacion pa nos y pa pueblo. No por ta asina cu partido AVP kier laba man y kier culpa tur 2 parlamentario y asina aprobando violencia contra hende muher!

Expresionnan haci den e articulo aki no necesariamente ta refleha opinion di ArenaPoliti.co