Business as usual no ta un opcion, e ta cobardia 

Lider di MEP Evelyn Wever-Croes a elabora riba riba e dalmento cu a tuma lugar den Parlamento siman pasa. “Unda cu bo bai, hendenan ta papia di e topico aki. Henter pueblo a wordo geshockt cu loke a pasa den Parlamento. Realmente un berguensa. Pueblo kier sa kiko a pasa realmente y pueblo kier sa ki sanccion tin pa locual cu a pasa, mirando cu ta actonan castigable. 
Pero locual tin mi mas preocupa ta e actitud di esnan na mando cu kier silencia e tema aki. Nan kier pa e caso aki bai den doofpot, y pa nos bai na ‘business as usual’ bek.
Esaki ta algo hopi peligroso. Parlamento tabata testigo di hopi caso di abuso verbal, y a laga nan pasa, ‘business as usual’. 

Despues riba un dia un parlamentario di AVP sr Baba Herde a haya ta bon pa insulta e presidente di Parlamento cu e F***-word durante votacion, cu ta e momento cu mester tene silencio den sala. E biaha ey riba insistencia di tur parlamentario, sr. Herde mester a pidi su disculpa publicamente. A tarda dos siman, peor el’a pidi su disculpa y Parlamento a sigi cu ‘business as usual’.
Awor ta sla a cai. Marisol Lopez-Tromp a dal Chris Dammers dos wanta, y Chris Dammers na su turno a dal Marisol Lopez-Tromp un mokete den su cachete. Y awor tambe e lider di AVP kier pa tur hende keda keto y hink’e den doofpot? Parlamentarionan di AVP ta pidi pa sigi cu ‘business as usual’? Donjonan di curpa mes no a pidi disculpa, Mike Eman como nan lider no a pidi disculpa, ningun sanccion a wordo impone, anto AVP kier pa nos sigi cu ‘business as usual’?
Si nos sigi cu ‘business as usual’ awor, kiko nos por spera sigientemente? Cu nan ta mata otro den Parlamento, y Mike Eman ta bolbe pidi pa tur hende keda keto y sigi cu ‘business as usual’?
Te unda nos ta dispuesto pa bai cu silencia cosnan asina? Ta unda nos ta dispuesto pa bai cu ‘business as usual’?
Ami ta di opinion cu awor nos mester para hunto como un Parlamento pa duna e senjal cla pa pueblo: nos no ta acepta ni tolera ningun clase di agresion fisico, y sigur no abuso di hende muher. Pesey Parlamento y pueblo mester haya sa kiko a pasa, ken a dal ken, y Parlamento mester pone nan para responsabel. Keda keto ta cobardia, e no ta un opcion.
Dia parlamentario Baba Herde a insulta presidente di parlamento durante votacion, nos a sigi cu ‘business as usual’. Awor cu parlamentario Chris Dammers a dal Marisol Lopez-Tromp un mokete den su cachete, tambe nan kier pa nos sigi ‘business as usual’? Mi ta invita e demas lidernan di fraccion den Parlamento pa nos defini te unda nos ta dispuesto pa sigi cu ‘business as usual’!

Expresionnan haci den e articulo aki no necesariamente ta refleha opinion di ArenaPoliti.co