E incidente tristo y bochornoso cu a tuma luga diaranson siman pasa den parlamento, unda e presidente y e vice-presidente tabata e protagonistanan principal den un otro espectaculo di agresion fisico y verbal, tabata un otro dia scur den nos democracia y tambe uno historico. No mucho tempo despues, diripiente diferente parlamentarionan a core lihe pa condena e abuso y agresion aki publicamente. Pero e la keda na palabranan so, pasobra ningun di nan a tribi di punta un dede kende ta esun responsabel pa e dia scur aki. E postura aki, tabata di spera di un parlamento cu cada aña na apertura di e aña parlamentario, ta reconoce cu e nivel di calidad y integridad ta hopi abou, pero asina mes ta laga e decadencia parlamentario continua. Esaki ta e mesun parlamento cu tabata orguyoso cu pa falta di integridad parlamentario, un comision a wordo instala pa e ‘Interparlementair Koninkrijksoverleg (IPKO)’ pa mehora esaki. Esaki tambe ta e mesun parlamento cu a ‘lucha’ pa e comision aki, ta wordo presidi pa un miembro cu a haya su mes envolvi den diferente casonan hudicial. Interesante pa sa awor cu ki cara e delegacion di Aruba lo cuminsa e reunion di IPKO, cu ta cuminsa e siman aki, despues di e ultimo atake riba nos democracia aki. Pero igual tambe ta interesante pa sa, con e otro paisnan den Reino lo mira e delegacion Arubano, despues cu ‘De Telegraaf’ y otro medionan internacional a publica riba e ‘Mokete Parlamentario Arubiano’.

Diferente parlamentarionan kier laga pueblo sa, cu nan si no ta aproba abuso y agresion. Pero tuma un posicion politico pa reenforsa y haci e postura aki mas creibel, Nooooo. Anto cuanto balor e postura populista aki tin, si e no ta mara na un consecuencia politico? Un decision politico ta para los di cualkier investigacion hudicial. Loke a sosode den e organo mas halto di nos democracia y den e liderazgo, tambe ta duna e pueblo un mal nomber y imagen. Anto dicon ningun parlamentario kier tuma un posicion politico y integro, enbes di sconde tras di investigacionnan hudicial? Kisas e parlamentarionan ta spera cu despues di tempo, tur hende lo lubida riba e incidente aki y nan por bay bek na e orden di dia locual ta sigui tapa, sconde y legalisa bagamunderia? Of kisas nan ta spera cu ora e gran lider regresa Aruba, e por hipnotisa un parti di e pueblo cu un speech elocuente of cu un show di inicio di un otro proyecto atrobe y asina laga pueblo lubida e incidente aki? Of kisas nan lo ta pensando, si e gran lider por a logra pone un parti di pueblo lubida riba su agresion y atake personal riba e gobernador, e por haci’e atrobe?

Remarcabel ta, cu e gran lider ta hopi keto. Ni un reaccion of un hik riba e incidente scur aki. Kisas pasobra awor e ta concerni su propio partido y e no por saca ningun probecho politico? Kisas pasobra esaki ta mustra claramente cu e ta esun personalmente responsabel pa trece ‘e señora problematico’ (palabranan di e vice-presidente di Staten, 25 Mei 2016) den partido? Di tur forma e silencio total di e gran lider den e incidente scur aki, no por ta pasobra e ta mucho ocupa cu asuntonan di  Hulanda. Tampoco pasobra e por tin su boca yen cu lobster, manera custumber, cu e no por papia. A nos di partido ABO ta kere cu su silencio tin mas di haci cu e no sa con pa atende cu e bom bergonsoso aki. Ni na Aruba y tampoco internacional. Pasobra si e no actua, esaki lo comproba y enfatisa cu su palabranan di integridad ta puro blablabla. Pero si e actua, e lo tin cu actua contra ambos protagonistanan. E ultimo aki por tin consecuencianan serio pa su gobierno, manera su gobierno conoce caba diferente integrantenan ‘problematico’.

E declaracion haci pa e lider di fraccion di AVP, ‘Lopez-Tromp y Dammers mester evalua y saca nan conclusion’ (NoticiaCla, 27 Mei 2016), por wordo considera como tira e bala den e campo di e dos protagonistanan y resa cu nan si lo haci e corecto, sin cu AVP tin cu haci e trabou ‘sushi’. Ki cobardia! Un partido Cristian democrata cu ta respeta su mes, mester actua directo y duna e bon ehempel. Aki ta trata di un asunto di moralidad, integridad, etica y respet. Pa esey tin solamente un solucion y contesta: duna e bon ehempel, pues tur dos tin cu bay!

Durante e ultimo añanan, esaki tabata e partido cu a sembra e simia di tapa y legalisa tur sorto di bagamunderia acelera contra pueblo, pasobra nan tabatin e mayoria absoluto. Wel dicon diripiente e partido cu semper a tabata sa kico ta bon pa pueblo, no kier come e fruta aki cu e mesun speed y diligencia? E asunto aki a origina den e partido ‘Green’ y awor ta nan tin cu come e fruta aki nan so! Pues pueblo no kier scucha mas blablabla di parlamentarionan cu diripiente a bira politicamente corecto. Mustra integridad y ‘ruim op de boel per direct’. Come locual bo a sembra, pasobra esaki no ta asunto di hari pa pueblo!

(www.aboaruba.org, This email address is being protected from spambots. You need JavaScript enabled to view it.)

Expresionnan haci den e articulo aki no necesariamente ta refleha opinion di ArenaPoliti.co