Cu e ‘Mokete Parlamentario Arubano’ a marca un otro dia scur den nos historia democratico, esey ta sigur. Pero tambe locual a marca historia, ta e echo pa mira diferente parlamentario declara publicamente cu nan ta contra abuso y agresion, pero cu nan a scoge pa sconde tras di un investigacion hudicial enbes di tuma un decision politico. Esaki ta un incidente unda abuso y agresion a wordo uza den e organo politico mas halto di nos pais y pa e liderazgo. Pa un incidente asina, no tin cu warda riba ningun investigacion hudicial. Esaki ta un asunto di moralidad, integridad, respet y uno di mal ehempel. Pa un incidente tristo asina, tin un solo contesta: ambos protagonistanan tin cu bay.

Haci un declaracion publico pa mustra integro, pero no mara esaki na algun consecuencia politico, ta un muestra di un postura populista cu intencion di propaganda politico, manera nos ta den un aña electoral. Un otro ‘papieren tijger’ sin djente y cu tampoco sa morde. Cu mayoria parlamentario ta sinta riba un stoel fia, no por hustifica cu parlamento por keda sin haci locual ta corecto y necesario.

E ‘mokete’, ta e culminacion di añanan continuo di abuso, agresion y ‘bullying’ den parlamento. Nos tabatin e incidente di rancamento di plug di microfon, bringamento y destrucion. Esun unda e minister di Infrastructura a bin parlamento cu un papel higienico femenino. Esun cu un miembro femenino a wordo yama pa tur sorto di cos, pasobra e la subi di peso. Esun recien cu e lider di fraccion di AVP a manda e presidente di parlamento limpi, limpi. Tur esaki a pasa y tur hende a keda keto. Algun hasta a hari, mientras otronan ta cana rond blof y sinti nan mes tof pa nan ‘actuacion’. Tur e incidentenan aki por a sosode sin ningun sancion, pasobra supuestamente esaki ta locual politica mester ta awendia na Aruba. E politica di intimidacion y agresion, segun e politiconan tradicional, ta locual pueblo ta gusta y ta locual pueblo a vota p’e. Banda esaki, nos parlamentarionan a rek e interpretacion di inmunidad di tal forma, cu awendia nan por mata un hende den parlamento y ‘get away’ cu’ne. Ki locura y ki falta di respet pa e pueblo y democracia. E interpretacion amplio cu nan a duna na inmunidad, no ta corecto. Pero e ta ilustra claramente con nos parlamentarionan ta sinti cu nan ta mas cu e homber chikito y con leynan no ta conta pa nan. Reglanan di decencia y moralidad cu tin cu conta pa tur hende y tur ora, no ta conta pa nan. Con esaki por a sosode? Con nos democracia por a yega na e nivel aki? Cu ki of cua autoridad nos parlamentarionan por funciona awor?

Algun observacion di e ‘Mokete diaranson’, cu no tin nada di haci cu un caso hudicial, pero cu si por aclaria hopi y cu pueblo tin derecho pa sa:

1. Segun e vice-presidente, tabatin 4 miembro presente. Ningun punto di agenda por wordo trata of agrega, sin cu e miembro cu kier cu e punto ey wordo trata ta presente na e reunion. Kende ta e 2 miembronan cu kier a cambia nan plan di biahe y cu tabata e chispa pa e ‘mokete’?
2. Straño cu ningun di e 4 miembronan presente a mira exacto loke a pasa. Tur a bira ciego mientras cu nan tabata presente y cu tabatin hopi gritamento. Politica di Avestruz atrobe?
3. Den e 4 miembronan presente, tabatin un persona femenino. Kico e la haci durante e ‘mokete’ y dicon e tambe a perde su lenga awor? Por cierto e no mag tuma parti pa un otro persona femenino?
4. Unda e siguridad di parlamento tabata ta durante e ‘Mokete’?
5. Con a para cu e grabacionnan di e camaranan di siguridad, cu normalmente mester ta operacional, of esunnan cu ta televisa e reunionnan di parlamento? Diripiente tur camara a bira ciego of cu nan a wordo paga?
6. E presidente y e vice-presidente a wordo geschors, manera ta wordo haci cu tur persona ‘niet zomaar iemand’ den casonan similar, of ainda nan ta den funcion te ora cu logra pone e asunto aki den un ‘doofpot’, a la ‘Lainda’?
   
   

Palabra ta na PARLAMENTO!

(www.aboaruba.org, This email address is being protected from spambots. You need JavaScript enabled to view it.)

Expresionnan haci den e articulo aki no necesariamente ta refleha opinion di ArenaPoliti.co